АҚШ президенти Доналд Трамп ҳокимиятга келишидан олдин Россия ва Украина ўртасидаги урушни 24 соат ичида якунлашни ваъда қилганди, аммо унинг ташаббуси билан бошланган тинчлик музокараларида ҳамон сезиларли силжиш бўлмаяпти. Доналд Трамп мунтазам равишда кенг кўламли босқиннинг илк кунлари ҳақида ҳам фикр билдириб келади – ҳар сафар деталларни ўзгартириб, Россиянинг Киев томон юриш қилган, аммо лойга ботиб қолган танкларини тилга олади.
20 октябр куни Оқ уйда журналистлар билан мулоқот чоғида АҚШ президенти яна бир бор ушбу тарихни эсга олиб, бу сафар россиялик генераллардан бирига алоҳида эътибор қаратди.
Россиялик аҳмоқ генерал, жуда аҳмоқ одам. Улар минглаб танклар билан бетон автомагистрал бўйлаб ҳаракатланишаётганди. Уларни ҳеч нарса тўхтата олмасди. Уруш бир кунда тугаган бўларди. Аммо бу калтафаҳм генерал – унинг кимлигини ҳам билмайман, у ҳозир тириклигига шубҳам бор, у ҳамон биз билан экани даргумон – ўнгга, далалар томон йўл солади, кейин чапга бурилади ва Киев томон ҳаракатланади. Шосседа, бетон автомагистралда, шу вақтгача жуда яхши ҳаракатланиб келган йўлда қолиш ўрнига у шундай қарорга келади. Якунда танклар лойга ботиб қолади.
BBC рус хизмати Трампнинг бу сўзларини текшириб қўйган ва қуйидагича хулосага келган. 2022 йил февралида Беларусдан кириб келган Россия қўшинининг Киев томон юришига генерал-полковник Александр Чайко бошчилик қилганди. Нашрнинг қайд этишича, юриш муваффақиятсизликка учрашининг сабаби унинг катта йўлдан четга чиқиш қарори билан боғлиқ эмасди.
Киевга юриш украин ҳарбийлари томонидан тўхтатилганди. 2022 йил 26 февралида Украина қуролли кучлари пойтахт ташқарисидаги Ирпин дарёси орқали ўтган кўприкни портлатади, Россия қўшини сув тўсиғини айланиб ўтишга уринганида эса Козаровицкая тўғони бузиб ташланади. Бундан ташқари, Украина қуролли кучлари Россиянинг Бучада тизилиб турган зирҳли техникалари колоннасини яксон қилади. Россия армияси жиддий йўқотишларга учрайди ва қўмондонлик Беларусдан қўшимча кучларни ёрдамга олиб киришга мажбур бўлади.
Юриш муваффақиятсизликка учраганидан кейин Чайко қўмондонликдан олинади ва Россиянинг Суриядаги контингентини бошқариш учун юборилади. У 2025 йил июнига қадар ўша ерда қолади, бу вақтда мамлакатда давлат тўнтариши рўй беради ва президент Башар Асад ҳокимиятни қўлдан бой бериб, Москвага қочади.
