Володимир Зеленский 7 август оқшомида Белградда Сербия президенти Александр Вучич билан кечки овқат чоғида учрашди. Бу Украина раҳбарининг 2022 йилда Россиянинг кенг кўламли босқини бошланганидан кейин Сербияга амалга оширган илк ташрифи ҳисобланади.
Зеленский учрашувдан сўнг ижтимоий тармоқда «Сербияда икки томонлама мулоқотни бошладик», дея қисқача изоҳ қолдирди. Учрашув мазмуни ёки эришилган натижалар ҳақида қўшимча маълумот берилмади.
Александр Вучич эса ташриф икки мамлакат ўртасидаги муносабатларни янада ривожлантириш ва ўзаро манфаатли соҳаларда ҳамкорликни мустаҳкамлашга хизмат қилишини таъкидлади. Унинг сўзларига кўра, музокараларда иқтисодий алоқаларни кенгайтириш, энергетика соҳасидаги ҳамкорлик, хавфсизлик ҳамда Европа Иттифоқи билан муносабатлар масалалари муҳокама қилинади.
Сербия президенти матбуот хизмати маълумотига кўра, давлат раҳбарларининг расмий музокаралари 8 август куни Белграддаги Президент саройида бўлиб ўтади. Учрашув якунида икки президент оммавий ахборот воситалари вакиллари учун қўшма матбуот анжумани ўтказиши режалаштирилган. Шунингдек, Зеленский ташриф давомида Сербия бош вазири Журо Мацут билан ҳам учрашади.
Сербия Европа мамлакатлари орасида Россия билан энг яқин муносабатларни сақлаб қолаётган давлатлардан бири ҳисобланади. Белград 2022 йилда уруш бошланганидан кейин Москвага қарши санкциялар жорий этмаган ва энергетика соҳасида Россия билан ҳамкорликни давом эттирмоқда. Шу боис Европа Иттифоқи Сербиянинг Россия билан яқин алоқалари мамлакатнинг ЕИга аъзо бўлиш жараёнига салбий таъсир кўрсатаётганини бир неча бор таъкидлаган.
Президент Александр Вучич 2022 йилдан буён камида икки марта Россия президенти Владимир Путин билан шахсан учрашган. Хусусан, у 2025 йил 9 май куни Москвада бўлиб ўтган Ғалаба парадида иштирок этган эди.
Зеленский ва Вучич эса 2022 йил 24 февралдан кейин уч марта шахсан учрашган. Улар 2023 йилда Кишинёв ва Афинада, 2025 йилда эса Одессада ўтган «Украина – Жануби-Шарқий Европа» саммити доирасида музокаралар ўтказган.
AFP агентлигининг юқори лавозимли украиналик манбасига кўра, Зеленскийнинг Белградга ташрифи Россия учун муҳим сиёсий сигнал сифатида баҳоланмоқда.
