АҚШ Қуролли кучлари Марказий қўмондонлиги — CENTCOM 11 август куни Панама байроғи остида сузаётган юк кемасига зарба берилганини маълум қилди.
Американ томонининг билдиришича, M/V Vela Nova контейнеровози шу куни Уммон кўрфази орқали номи ошкор қилинмаган Эрон портига йўл олиб, АҚШ томонидан ўрнатилган денгиз блокадасини бузишга уринган.
CENTCOM баёнотига кўра, кема экипажи АҚШ кучларининг бир неча бор берилган огоҳлантиришларига жавоб бермаган. Шундан сўнг АҚШ Ҳарбий-денгиз кучларининг MH-60 вертолёти Vela Nova кемасининг машина бўлими томон иккита Hellfire ракетасини учирган.
Зарба оқибатида кеманинг рул бошқаруви ишдан чиққан. Шу билан бирга, хабарда экипаж аъзолари орасида жабрланганлар бор-йўқлиги ҳақида маълумот келтирилмаган.
АҚШ ҳарбийларининг маълум қилишича, 11 август ҳолатига кўра, CENTCOM Эрон блокадасини бузиб ўтишга уринган 55 та тижорат кемасини бошқа йўналишга бурган. Бундан ташқари, блокадани бузган учта кема ҳаракатдан чиқарилган, яна иккита кемага АҚШ ҳарбийлари чиқиб, назоратни қўлга олган.
VesselFinder кемалар ҳаракатини кузатиш хизмати маълумотларига кўра, Vela Nova контейнеровозининг жойлашуви ҳақидаги сўнгги маълумот 6 август куни қайд этилган. Ўша вақтда кема Ҳиндистоннинг Нава-Шева портида бўлган.
Трамп Ҳўрмуз бўғози АҚШ назоратида эканини айтди
АҚШ президенти Доналд Трамп эса Вашингтон ҳозирда Ҳўрмуз бўғозини тўлиқ назорат қилаётганини маълум қилди.
У журналистларга Эрон билан боғлиқ вазият Вашингтон учун яхши кетаётганини айтиб, “Биз Ҳўрмуз бўғозини тўлиқ назорат қиляпмиз”, дея таъкидлаган.
Шу билан бирга, Трамп Теҳронга ишонмаслигини билдирган. Унинг сўзларига кўра, агар Эрон томони бирор ҳаракат амалга оширса, унга зарба берилади.
Ҳўрмуз бўғози Форс кўрфазини Уммон кўрфази ва Араб денгизи билан боғлайдиган стратегик денгиз йўлаги ҳисобланади. У орқали халқаро нефть ва газ ташувларининг салмоқли қисми амалга оширилади. Шу сабабли бу ҳудуддаги ҳар қандай ҳарбий кескинлик халқаро денгиз қатнови ва энергетика бозорларига таъсир кўрсатиши мумкин.
Бундан бир неча кун олдин Эрон расмийлари Ҳўрмуз бўғозини кемалар ҳаракати учун очиш масаласида АҚШга янги шартларни илгари сурган эди. Улар орасида уруш оқибатлари учун товон пули тўлаш ҳамда Эронга қарши санкцияларни бекор қилиш талаби бор.
АҚШ томони эса Эронга нисбатан денгиз блокадасини давом эттирмоқда. Vela Nova билан боғлиқ воқеа Вашингтон блокадани таъминлаш учун тижорат кемаларига нисбатан ҳам ҳарбий куч ишлатишга тайёр эканини кўрсатувчи навбатдаги ҳолат бўлди.
