Марказий банк раиси Тимур Ишметовнинг айтишича, форум доирасида Ўзбекистоннинг Марказий банк рақамли валютаси бўйича махсус концептуал ҳужжат эълон қилинади. Бу ҳақда Kun.uz мухбири 24 август куни Тошкентда бошланган Silk Road Finance&Technology Forum-2026 халқаро форумидан хабар бермоқда.
Ишметовнинг сўзларига кўра, ҳужжатда CBDCнинг Ўзбекистонда қўлланиши мумкин бўлган йўналишлари, унинг дизайн вариантлари, турли ечимларнинг афзаллик ва чекловлари, шунингдек, молия тизими учун юзага келиши мумкин бўлган оқибатлар баҳоланади.
“Форум доирасида биз CBDC бўйича концептуал ҳужжат эълон қиламиз. Унда фойдаланиш мумкин бўлган ҳолатлар, дизайн вариантлари, асосий мувозанатлар ва молия тизими учун оқибатлар баҳоланади. Унинг хулосаларидан тажриба-синов босқичини бошлаш, оптимал ёндашувларни синаб кўриш ҳамда рақамли валюта Ўзбекистонда инновациялар ва рақамли иқтисодиётни қандай қўллаб-қувватлаши мумкинлигини баҳолаш учун фойдаланамиз”, — деди Ишметов.
Шундай қилиб, Марказий банк ҳозирча рақамли валютани муомалага чиқариш ҳақида эмас, аввало унинг имкониятларини ўрганиш ва тажриба орқали синаб кўриш босқичига ўтишни режалаштирмоқда.
Ишметовнинг таъкидлашича, Ўзбекистон молиявий тизимни рақамлаштириш ва FinTech соҳасини ривожлантириш бўйича янги босқичга ўтмоқда.
“Биз ўзимизнинг биринчи миллий FinTech стратегиямизни ишлаб чиқдик ва унинг атрофидаги тартибга солиш доирасини мустаҳкамламоқдамиз. Бизнинг тартибга солувчи қумдонимиз инновацион молиявий маҳсулотлар ва хизматларни, шу жумладан халқаро ҳамкорлар томонидан таклиф этилган ечимларни синовдан ўтказиш учун аниқ ва самаралироқ муҳитни таъминлаш мақсадида янада такомиллаштирилмоқда”, — деди Марказий банк раиси.
Унинг қайд этишича, Ўзбекистонда тўловларнинг 57 фоизи нақдсиз шаклда амалга оширилмоқда ва бу кўрсаткич йил сайин ошиб бормоқда.
“Молиявий инклюзивлик бизнинг асосий сиёсатларимиздан бири бўлиб қолмоқда. Тўловларимизнинг 57 фоизи нақдсиз бўлиб, бу кўрсаткич ҳар йили ўсиб бормоқда. Иқтисодиётнинг ярмидан кўпи кичик ва ўрта бизнес ҳисобланади. Шу сабабли молиялаштиришга киришни таъминлаш тобора ортиб бораётганига эътибор қаратилмоқда. Бизнинг мақсадимиз — чидамли молиявий тизим ва самарали иқтисодий фаолиятни ривожлантиришдир”, — деди у.
FinTech соҳасига 1 млрд доллар инвестиция жалб қилиш мақсад қилинган
Ишметовнинг айтишича, бир йил аввал президент Марказий банкка Ўзбекистон FinTech секторини ривожлантиришни жадаллаштириш ва молиявий инновациялар учун шарт-шароитларни кучайтириш вазифасини қўйган.
