Маълум бўлишича, Тўрақўрғон туманининг бир қисмидан оқиб ўтувчи Сирдарё дарёси атрофида маҳаллий тадбиркорлар қирғоқда дам олиш масканлари ташкил этиб, тадбиркорлик билан шуғулланади. Дам олиш учун келганларга катерда сайр қилиш фаолияти ҳам йўлга қўйилган.
23 август кунги бахтсиз ҳодисада ана шундай 10 та катердан 3 таси иштирок этган.
Катеримда 6 аёл бор эди...
“Ўша куни катеримга олти нафар аёл киши олган эдим. Аёллар “секинроқ ҳайданг, орамизда ёши катталар бор, қўрқишади” дейишгани учун секин ҳайдадим. Ҳаракатланаётган пайтимда олдимдан иккита катер ўтди, уларга йўл бердим. Кейин секин ҳаракатланиб кетаётган вақтимда, бошқа бир катер чап тарафимдан келиб уриб, одамларимнинг устига чиқиб кетган... Агар ёнидан келиб урганда ўлим ҳолати бўлмаслиги керак эди.
Катерни бошқариш учун Тошкентда ўқиб махсус гувоҳнома олганман”, – дейди шифохонада даволанаётган катер ҳайдовчиси Нурмуҳаммад Ҳабибуллаев.
Катерлар фаолияти тўхтатилган
“23 август куни асрдан кейин дарёда тўполон бўлиб кетди. Қарасам, икки катер тўқнашган экан. Одамлар ҳалокатга учраганларга ёрдам бериш учун сувга тушишди. Сувда чўкиш ҳолати бўлмади – катерга чиққанларга одатда қутқарув нимчалари берилади, ҳаммада “жилет” бор эди.
Шу воқеадан кейин катерларнинг ҳаммасини тортиб қўйишди, яъни олиб чиқиб ташлашди сувдан. Кутилмаган бахтсиз ҳодиса бўлди-да, дам олиш учун келган опа-сингиллар ҳалок бўлишди”, – дейди воқеа гувоҳи Абдулла Абдуманнонов.
“Ўғлим 8 йилдан бери катер ҳайдар эди”
“Дарёнинг бўйида тадбиркорлик фаолиятини йўлга қўйганмиз. Ўша куни ўғлим мижозларини катерига солиб, тепа томонга ҳайдаган. Кўприк тагида бошқа бир катерлардан бири бузилиб қолган экан. Ўша бузилиб қолган кемани четроққа олишаётган бир пайтда, ўғлим бошқарувидаги катер тўсатдан тепадан келиб қолган. Шу билан тўқнашув содир бўлган.
