Транспорт назорати инспекциясининг Автомобил транспортида назорат бошқармаси Тошкент шаҳри ва Тошкент вилояти ҳудудий бўлимларида фаолият юритаётган инспекторлар назорат-рейд тадбирларида боди-камералардан фойдаланишни бошлади.
Янги амалиёт назорат жараёнларини замонавий технологиялар асосида ташкил этиш ҳамда инспекторлар фаолиятининг шаффофлигини оширишга қаратилган.
Маълум қилинишича, боди-камералардан фойдаланиш амалиёти кейинчалик Транспорт назорати инспекциясининг бошқа ҳудудий бўлимларида ҳам босқичма-босқич жорий этилади.
Хусусан, 2027 йилнинг биринчи ярим йиллиги давомида Инспекция инспекторларини боди-камералар билан тўлиқ таъминлаш кўзда тутилган.
Қайд этилишича, мазкур чора назорат тадбирларида қонунийлик ва шаффофликни янада мустаҳкамлашга хизмат қилади.
Шунингдек, боди-камералардан фойдаланиш назорат-рейд тадбирлари жараёнини қайд этиш орқали фуқаролар ва тадбиркорларнинг ҳуқуқ ҳамда қонуний манфаатларини таъминлашга қаратилган.
