Киевда Украина президенти Володимир Зеленский иштирокида АҚШ президенти Доналд Трампнинг махсус вакиллари Стив Уиткофф ва Жаред Кушнер билан музокаралар ўтказилди.

Учрашувда Германия, Франция ва Буюк Британиянинг миллий хавфсизлик бўйича маслаҳатчилари ҳам қатнашган.

Зеленский 6 сентябр куни Уиткофф ва Кушнер билан ўтказган қўшма матбуот анжуманида музокараларнинг асосий мавзулари ҳақида маълум қилди.

Унинг сўзларига кўра, томонлар Россиянинг Украинага қарши урушини тугатишнинг эҳтимолий шартлари, Ғарб давлатларининг яқин истиқболда Киевни қўллаб-қувватлаши, Украина учун хавфсизлик ва иқтисодий кафолатлар ҳамда ҳудудий масалани муҳокама қилган.

Зеленский уруш қишда ҳам давом этишини истисно қилмаяпти

Украина президентининг фикрича, ҳозирги вазият уруш қишда ҳам давом этиши мумкинлигини кўрсатмоқда. Шу сабабли Киев Ғарб ҳамкорларидан махсус қишки ёрдам пакети олишга умид қилмоқда.

Зеленский Украина АҚШ билан бу борада келишувга эришишга умид қилаётганини, уруш қишда ҳам давом этса, Европа ҳамкорларининг қўллаб-қувватлашига ҳам таянишини айтган.

Хусусан, Киев Америка суюлтирилган табиий газидан (LNG) катта ҳажмда фойдаланиш имкониятига ҳамда ҳаво ҳужумидан мудофаа тизимлари бўйича янги етказиб беришларга умид қилмоқда.

Axios нашрининг музокаралардан хабардор манбасига кўра, Зеленский Уиткофф ва Кушнер билан учрашувда Украина уруш шароитида қишга қандай тайёрланаётгани масаласини ҳам кўтарган.

АҚШ вакиллари эса Вашингтон қиш бошлангунига қадар тинчлик музокараларида жиддий натижага эришишни хоҳлаётганини билдирган.

Axiosʼнинг яна бир манбаси Киевдаги музокараларни «яхши» деб баҳолаган. Унинг айтишича, Уиткофф ва Кушнер энди манфаатдор томонлар билан биргаликда тинчлик таклифларининг «янгиланган варианти» устида ишлаш ниятида.

Ҳудудий масала ҳам муҳокама қилинган

Зеленский музокараларда ҳудудий масала ҳам кун тартибида бўлганини тасдиқлади.

Унинг таъкидлашича, томонлар бу мавзуни узоқ муҳокама қилмаган бўлса-да, масала юзасидан фикр алмашиш имконияти бўлган.

Украина президенти бундай мураккаб масалалар фақат давлат раҳбарлари даражасида ҳал қилиниши керак, деган позициясида қолаётганини билдирди.