Ташкилот раҳбари Жон Пауэлл эълон қилган тасвирларда қора рангдаги, қанотсимон корпусга эга Hazel аппарати SuperTandem деб номланган улкан баландлик дирижаблидан ажралаётгани кўрсатилган.
Пауэллнинг тушунтиришича, ушбу кадрлар Hazel ҳақида тайёрланаётган видеодан олинган компьютер анимациясидир. Яъни бу реал парвоз тасвирлари эмас.
Янги визуализация JP Aerospace бир неча ўн йилдан бери ишлаб келаётган Airship to Orbit концептига яна эътибор қаратди.
Ушбу ғоянинг асосий мақсади — ҳаводан енгил аппаратлар, яъни улкан аэростат ва дирижабллардан фойдаланиб, одамлар ҳамда юкларни босқичма-босқич орбитага олиб чиқиш.
JP Aerospace ўзини «Американинг бошқа космик дастури» деб атайди. Ташкилот 40 йилдан ортиқ вақтдан бери нотижорат асосида фаолият юритиб келади ва асосан кўнгиллилар меҳнатига таянади. Шу вақт мобайнида унга Жон Пауэлл раҳбарлик қилиб келган.
Космосга чиқиш қандай амалга оширилиши керак?
Airship to Orbit дастури анъанавий ракета учирилишидан кескин фарқ қиладиган сценарийни таклиф этади.
Биринчи босқичда стратосфера дирижабли йўловчилар ва юкларни атмосферанинг юқори қатламларида жойлаштирилиши режалаштирилган Dark Sky Station — «Қоронғи осмон станцияси»га олиб чиқиши керак.
Шундан сўнг янада катта орбитал дирижабл ишга тушади.
Лойиҳага кўра, мазкур аппарат электр двигателлари ёрдамида жуда секин ва босқичма-босқич тезлашиб, охир-оқибат орбитал тезликка чиқиши керак.
Бундай саёҳат бир неча кун давом этиши мумкин.
Бу эса одатий ракета учирилишига мутлақо бошқача ёндашув. Анъанавий ракеталар атмосферадан бир неча дақиқа ичида ўтиб, жуда катта тезликка чиқади ва бунинг учун улкан миқдорда энергия сарфлайди.
JP Aerospace ғояси эса йўловчи ёки юкни бир зумда эмас, балки босқичма-босқич баландликка кўтариш ва кейин аста-секин орбитал тезликка етказишни назарда тутади.
Ташкилот аввал ҳам баландлик рекорди ўрнатган
JP Aerospace аэростатлар асосидаги йирик аппаратлар юқори баландликларга кўтарила олишини амалда намойиш қилган.
2011 йил октябрида ташкилотнинг Tandem дирижабли АҚШнинг Невада штатидаги Блэк-Рок чўли устида тахминан 29 километр баландликка кўтарилган.
