Пневматик тўппончадан 10 метрдан отиш дастурида қатнашган Владимир Свечников Осиё ўйинлари олтин медалини қўлга киритди.
Свечников 244,3 очко билан Осиё ўйинлари рекордини ҳам янгилаган.
Миллий олимпия қўмитаси қайд этишича, бу – ўқ отиш спорти турларида Осиё ўйинларида 32 йиллик танаффусдан кейин қўлга киритилган олтин медал бўлди.
Шунингдек, эшкак эшувчилар жамоаси яна икки кумуш ва битта бронзага эга чиқишди.
Академик эшкак эшиш баҳсларида аёллар ўртасида кечган W2- жуфтлик дастурида Айдана Сметуллаева ва Анна Аксёнова финиш чизиғини иккинчи бўлиб кесиб ўтишди ва кумуш медал билан тақдирланди.
Академик эшкак эшиш бўйича М4х йўналишида қатнашган Давржон Давронов, Шаҳбоз Холмурзаев, Меҳрожбек Маматқулов ва Павел Сорин квартети бронза медалини қўлга киритди.
М4 дастурида эса Дилшод Худойбердиев, Фазлиддин Каримов, Алишер Турдиев ва Максим Голубев квартети кумуш медалга сазовор бўлди.
Шу тариқа, академик эшкак эшувчилар жамоаси Осиё ўйинларидаги иштирокини якунлади. Жамоа Ўзбекистон делегацияси ҳисобига жами 9 та медал олиб келди: 1 та олтин, 6 та кумуш ва 2 та бронза.
Байдарка ва каноэда эшкак эшиш жамоаси эса турнирдаги иштирокини давом эттиради. Ҳозирча бу жамоа 1 та олтин, 1 та кумуш ва 1 та бронза медал қўлга киритган.
Ҳозирча Ўзбекистон делегацияси умумий рейтингда 4 та олтин, 11 та кумуш ва 8 та бронза жамғарган ҳолда 7-ўринга кўтарилди.
