DW хабарига кўра, Путин бу ҳақда 22 октябрда эълон қилинган, Россия давлат медиаҳолдинги ВГТРК журналисти Павел Зарубинга берган интервюсида гапирган.
У АҚШ президентининг махсус вакили Стивен Уиткофф билан учрашувда Вашингтон воситачилигида Киев билан мулоқотни тиклашга рози бўлганини айтган. Путиннинг таъкидлашича, музокаралар қисқа муддатли ҳарбий танаффусга эмас, якуний тинчлик келишувидан кейин Украина ва Россия хавфсизлигини таъминлаш масалаларига қаратилиши керак.
«Биз шу мақсадга эришиш учун ушбу алоқаларни қайта бошлашга тайёрмиз», — деган Россия президенти.
Бироқ Москва музокараларда қайси даражадаги вакиллар иштирок этишини очиқламаган. Украина президенти Володимир Зеленский эса Путин ва АҚШ президенти Доналд Трамп билан уч томонлама учрашувда урушни тугатиш масаласини муҳокама қилишга тайёрлигини билдирган.
Кремл аввал бундай учрашувни рад этган ёки Киев қабул қилмаган шартларни, жумладан, Зеленскийнинг Москвага келишини таклиф қилган эди.
Путин ва Уиткофф учрашувидан бир неча соат ўтиб, Россия президенти ёрдамчиси Юрий Ушаков Америка томони олиб келган таклифлар Москвани тўлиқ қониқтирмаслигини айтган.
Интервюда Путиндан Зеленскийнинг жангларни ҳозирги фронт чизиғи бўйича тўхтатишга тайёрлиги ҳақида ҳам сўралган. Россия президенти бу ғояга розилик билдириш ўрнига: «Бу уларнинг ҳудуди эмас, бу тарихий Россия ҳудуди», — деб жавоб берган.
Аввалроқ ОАВ Доналд Трамп ҳам 2025 йилда, Путин билан Анкориждаги учрашувидан олдин, жангларни амалдаги фронт чизиғи бўйича тўхтатиш ғоясини қўллаганини хабар қилган эди. Бироқ бу Россия раҳбариятининг Украина қўшинларини бутун Донбассдан олиб чиқиш талаби билан мос келмайди.
Путин Россия «уришишни истамаслиги»ни ҳам даъво қилиб, жанглар давом этаётгани учун масъулиятни Киев зиммасига юклаган. У руслар ва украинлар «бир халқ» эканини айтган ва буни гўё генетик тадқиқотлар тасдиқлашини билдирган. Интервюда мазкур тадқиқотларга аниқ ҳавола келтирилмаган.
Айни пайтда, DW қайд этишича, Путиннинг Уиткофф билан учрашувидан кейин ҳам Россиянинг Украинага ҳужумлари давом этган.
22 октябр куни Украина томони Харкив вилоятининг Лозовая шаҳридаги кийим-кечак бозори, Киевнинг тарихий маркази, шунингдек, турли ҳудудлардаги автомобил йўллари ва кўприкларга зарбалар берилганини маълум қилган. Украина томони маълумотига кўра, Лозоваядаги ҳужум оқибатида икки киши ҳалок бўлган, 34 киши жароҳатланган.
