«Люди Байкала» нашри 4 октябр куни Иркутскдаги бир неча касалхонада уч ҳафталик карантин жорий этилгани ҳақида хабар берди. Журналистлар маълумотига кўра, шаҳардаги 1-, 3-, 10-сонли клиник шифохоналар ҳамда Ивано-Матренинская болалар шифохонаси ёпилган. Шунингдек, шу кунларда фарзанд кутаётган оилалардан бири нашрга Иркутскдаги туғуруқхоналардан бирида ҳам карантин эканини айтиб берган.
Нашрнинг соғлиқни сақлаш соҳасидаги суҳбатдошининг сўзларига кўра, иркутсклик шифокорлар «аллақачон ўлат тўғрисида очиқчасига гапирмоқда», аммо шифохоналарга келиб тушаётган ҳужжатларда бу ташхис қайд этилмаган. «Ўпка ўлати тарқалганда танлаб карантин қўлланмайди – чекловлар барча тиббиёт муассасаларида бир вақтнинг ўзида жорий этилади», — дея ўз манбаси сўзларини келтиради «Люди Байкала».
«Люди Байкала» хабаридан кўп ўтмай Роспотребнадзор баёнот берди. Идора «Иркутск области, Иркутск ва Шелехов шаҳарларида санитария-эпидемиологик вазият барқарорлиги»ни маълум қилди, шунингдек, «махсус комплекс чора-тадбирлар» ташкил этилгани ва ўтказилгани ҳақида ҳисобот берди.
Бундай тадбирларга Иркутскдаги ўлатга қарши институт ходими «этиологияси аниқланмаган пневмония»га чалингани сабаб бўлган. Роспотребнадзордагилар вафот этган аёлнинг организмида «унинг касбий фаолияти билан боғлиқ микроорганизмлар» топилмаганини алоҳида қайд этган.
3 октябр куни Шелеховдаги Иркутск алюминий заводида ниқоб режими жорий этилганди. Завод директори Артём Фомин буни профилактик чора деб атаган. «Ўзини асраганни Худо ҳам асрайди – эҳтиёткорлик чораларига риоя қилинг», – дея ёзган у ўз телеграм-каналида.
Бир неча кун олдин айнан Шелеховдаги (Иркутскнинг йўлдош шаҳри) шифохоналардан бирида 28 ёшли бемор Даря Шипилова вафот этганди (журналистлар аниқлашича, у ўлатга қарши институтда лаборантка бўлиб ишлаган). Уни шифохонага 29 сентябр куни олиб келишган, икки кун ўтиб унинг жони узилган. Ўшанда ОАВда рўй берган ҳодиса бўйича икки версия тилга олинганди.
Улардан бирига кўра, Шипилова Таиланддан қайтганидан кейин ўпка ўлати ташхиси билан касалхонага тушиб қолган. Бошқа версияга кўра, у қўққисдан ўлат қўзғатувчи солинган пробиркани синдириб қўйган. Роспотребнадзор эса институтда патоген микроорганизмлар билан боғлиқ фавқулодда ҳолат рўй бермаган.
Шу билан бирга, Иркутск области расмийлари беморнинг ўлими, шунингдек, унинг ўлат билан касаллангани эҳтимоли ҳақида баёнот бермаган. Губернатор Игор Кобзев 2 октябр куни Россиянинг бош санитария врачи Анна Попова (у шахсан Иркутскка учиб келган) билан йиғилиш ўтказганини маълум қилди ва бунга «регионда яшовчи фуқаро ўта хавфли инфекция билан касаллангани ҳақида тарқалган маълумот» сабаб бўлганини айтди.
