DW хабарига кўра, Ричард Блюментал бошчилигидаги сенаторлар 13 октябр куни АҚШ президентига шу мазмунда мактуб йўллаган.

Мурожаатда Конгресс ва Америка халқи Украинадаги уруш тугашини қўллаб-қувватлаши, бироқ тинчлик адолатли шартлар асосида ўрнатилиши кераклиги таъкидланган.

Сенаторлар Россия дизел экспортига нисбатан АҚШ санкцияларининг бекор қилиниши Путиннинг ҳарбий тизимини қўшимча маблағ билан таъминлаши ва Украина тинч аҳолисига ҳужумларни давом эттириш имконини беришини билдирган.

«Бу келишув рақибимизга совға ва иттифоқчиларимизга нисбатан хиёнатдир. У бекор қилиниши керак», — дейилади мактубда.

Мурожаат муаллифларининг фикрича, ёнилғи қимматлигидан қийналаётган америкалик оилалар Россия дизелининг жаҳон бозорига қайтиши натижасида сезиларли енгилликни ҳис қилмайди.

Шу сабабли улар Трампни Россияга ҳамда унинг урушни давом эттиришига ёрдам бераётган давлатларга, хусусан, Хитойга иқтисодий босимни кучайтиришга чақирган. Сенаторлар бунинг учун Россия ва Эронга қарши санкциялар тўғрисидаги қонун берган ваколатлардан фойдаланишни сўраган.

Мактубни демократлар Ричард Блюментал, Жин Шоҳин, Ричард Дурбин, Шелдон Уайтхаус, Жек Рид ва Кристофер Кунс имзолаган. Уларга республикачилар Митч Макконнелл, Том Тиллис, Сюзан Коллинз, Алан Стюарт Армстронг, Лиза Мурковски ва Жон Корнин қўшилган.

Мурожаат нусхалари давлат котиби Марко Рубио ва молия вазири Скотт Бессентга ҳам юборилган.

Трамп 9 октябр куни Владимир Путин билан телефон мулоқотидан сўнг Россия дизел ёнилғисини Америка ва жаҳон бозорларига етказиб бериш бўйича келишувга эришилганини эълон қилган эди.

Унинг баёнотига кўра, Россия компаниялари дастлаб 300 минг тоннадан ортиқ, ноябрда яна 500 минг тонна, шундан кейин эса 1 миллион тонна дизел жўнатиши керак. Кейинчалик яна 3 миллион тонна етказиб бериш ҳам тилга олинган, аммо бу ҳажм учун аниқ муддат кўрсатилмаган.

АҚШ Молия вазирлиги Россия дизелига нисбатан санкциялар амал қилишини 2027 йил апрелигача тўхтатувчи бош лицензия чиқарган.

Россиянинг «Вести» дастури 12 октябр куни дизелнинг биринчи партияси Санкт-Петербургдан АҚШ шарқий соҳилига йўл олганини хабар қилган.