«Дунё» ахборот агентлигининг Беларус ОАВга таяниб хабар беришича, тажриба Витебск туманидаги «Ольговское» ишлаб чиқариш кооперативи далаларида ўтказилмоқда. Бу хўжаликда Ўзбекистондан олиб келинган мазкур нав илк бор экилмоқда.
Саримсоқпиёз учун унумдор ва юмшоқ тупроқли ер танланган. Экиш жараёнини ўзбек агрономлари маҳаллий мутахассислар билан биргаликда назорат қилмоқда.
Ишларда Андижон вилоятида фаолият юритувчи «Техмаш» қўшма корхонасининг махсус экиш техникаларидан фойдаланилмоқда.
Мутахассислар Беларус иқлимида қайси экиш усули юқори ҳосил беришини аниқламоқчи. Шу мақсадда 75 сантиметрли икки қаторли ва 40 сантиметрли уч қаторли экиш схемалари синовдан ўтказилмоқда.
«Ольговское» кооперативи бош агрономи Олга Яковлеванинг айтишича, экилган саримсоқпиёзнинг ривожланиши доимий кузатиб борилади. Биринчи ҳосилни келаси йил июлида олиш мўлжалланган.
Шу мавсумда Л. Доватор номидаги Улла давлат коллежи далаларида ҳам Ўзбекистон саримсоқпиёзини экиш кўзда тутилган.
Агентлик Витебск вилояти билан Ўзбекистон ҳудудлари, хусусан, Андижон ўртасида қишлоқ хўжалиги ҳамкорлиги фаоллашаётганини қайд этган. Аввалроқ Витебск вилоятида ўзбек фермерларига картошка етиштириш учун 2 минг гектар ер ажратилгани ва чорвачилик бўйича қўшма лойиҳалар бошлангани хабар қилинган эди.
