11 ноябр, чоршанба куни Варшавада миллатчилар ва ўта ўнг қанот кучлари ташаббуси билан ташкил этилган «Мустақиллик марши» деб аталувчи юришда тахминан 250 минг киши иштирок этди. Бу ҳақда Полша пойтахти маъмурияти маълум қилди.
Ташкилотчиларнинг билдиришича, юриш қатнашчилари сони ярим миллиондан ошган.
AFP ахборот агентлиги эслатишича, Полшанинг Миллий мустақиллик кунига бағишланган намойиш Краков марказида олти кишининг ҳаётига зомин бўлган отишмадан бир неча кун ўтиб ташкил этилди.
Шунингдек, тадбир бош вазир Доналд Туск ҳукумати ва Полша президенти Карол Навроцкий тарафдорлари ўртасида Конституциявий трибунал устидан назорат учун кураш давом этаётган бир шароитда ўтказилди.
Шу муносабат билан тадбир давомида хавфсизлик чоралари кучайтирилди.
Намойиш бошланишидан олдин Полшанинг давлат мадҳияси янгради.
AFP хабар беришича, йиғилганларнинг айримлари қўлларида машъаллар ушлаб турган. Улардан кўтарилган қуюқ тутун юриш иштирокчиларини қоплаб олган.
Кўпчилик Полша давлат байроғи рангларига мос қизил ва оқ либосларда келган. Намойишчилар миллий байроқларни ҳилпиратиб юришган.
Ўнг экстремистик рамзлар
Журналистларнинг қайд этишича, Маданият ва фан саройи яқинида «Мустақиллик шаҳарчаси» деб аталган ҳудуднинг чодирлари ва стендлари ўрнатилган.
У ерда ташриф буюрувчиларга ибодат китоблари, қизил-оқ гулчамбарлар, иссиқ чой ва тузланган карам тарқатилган.
Бундан ташқари, ҳудудда «антисемитик ва Украинага қарши мазмундаги китоблар ҳамда ўнг экстремистик рамзлар туширилган буюмлар» ҳам тарқатилган.
AFP мухбирларининг кузатишича, айрим иштирокчилар турли шиорлар ёзилган плакатларни кўтариб келишган.
Улар орасида қуйидаги шиорлар ҳам бўлган:
- Make Europe white again — «Европани яна оқ танлилар қитъасига айлантирамиз». Бу шиор АҚШ президенти Доналд Трамп тарафдорларининг Make America Great Again — «Американи яна буюк қиламиз» шиорига ўхшатиб яратилган.
