Зироат Мирзиёева президент Шавкат Мирзиёевнинг Туркияга ташрифи доирасида БМТнинг Иқлим ўзгариши бўйича ҳадли конвенцияси томонлари конференциясининг 31-сессияси (COP31) доирасида ўтказилган юқори даражадаги учрашувда иштирок этди.
Тадбирда «Нол чиқинди» (Zero Waste) Глобал алянси ташкил этилгани эълон қилинди. Янги тузилма табиий ресурслардан оқилона фойдаланиш, чиқиндиларни камайтириш ва экологик барқарорликни таъминлаш йўлида халқаро ҳамкорликни кучайтиришга қаратилган.
Учрашувда сўзга чиққан Зироат Мирзиёева Туркия биринчи хоними Амина Эрдўғанга таклиф ва самимий меҳмондўстлик учун миннатдорлик билдирди. Шунингдек, унинг «Нол чиқинди» ташаббусини халқаро миқёсда илгари суришга қўшаётган шахсий ҳиссасини эътироф этди.
Ўзбекистон биринчи хоними Глобал алянснинг ташкил этилишини қўллаб-қувватлаб, унинг доирасида бир қатор ташаббусларни амалга оширишни таклиф қилди.
Хусусан, экологик таълимни ривожлантириш, ёшлар томонидан илгари сурилган экологик лойиҳаларни қўллаб-қувватлаш ва уларни амалиётга татбиқ этишга алоҳида эътибор қаратилди.
Қайд этилишича, «Нол чиқинди» Глобал алянси давлат ва ҳукумат раҳбарлари рафиқаларининг табиий ресурсларни асраш ва чиқиндиларни камайтириш борасидаги саъй-ҳаракатларини мувофиқлаштиришга хизмат қилади.
