Shaxmat bo‘yicha jahon chempionining menejyeri shaxmatchilar dam olish xonasidan kameralarni olib tashlashni so‘radi

Hozirda shaxmat qiroli toji uchun norvegiyalik shaxmatchi, jahon chempioni Magnus Karlsen va rossiyalik Sergey Karyakin o‘rtasida Nyu-Yorkda o‘tayotgan uchrashuvda norvegiyalik uchun noqulay vaziyat yuz berdi. 

Ma'lum qilinishicha, Karlsenning menejyeri uchrashuv tashkilotchilaridan shaxmatchilar yurishlar orasidagi tanaffuslar vaqtida dam oladigan  xonadan videokameralarni olib tashlashni iltimos qilgan. Bu haqda "Sport-ekspress" nashri xabar bermoqda. 

Gap shundaki, bu iltimos ijtimoiy tarmoqlarda tanaffus vaqtida Karyakin navbatdagi yurish ustida bosh qotirayotgan bir paytda Karlsen dam olish xonasidagi divanda uzala tushib yotgani tasvirlangan fotosurat tarqagandan keyin bildirilgan.

Karlsen menejyerining aytishicha, norvegiyalik shaxmatchi dam olish xonasidan translyatsiya ketayotganini bilmagan. Uchrashuv tashkilotchilari iltimosni inobatga olib, boshqa bunday translyatsiyalarni olib bormaslikka va'da berdilar.

Eslatib o‘tamiz, hozirda shaxmatchilar 5 ta partiya o‘tkazdilar va ularning barchasini durang bilan yakunladilar. Ayni vaqtda umumiy hisob 2,5:2,5. Navbatdagi partiya bugun, 18 noyabrda bo‘lib o‘tadi.