Abdulaziz Kamilov Yaponiyalik hamkasbiga maktub yo‘lladi

O‘zbekiston Respublikasi Tashqi ishlar vaziri Abdulaziz Kamilov Yaponiya Tashqi ishlar vaziri Fumio Kisidaga maktub yo‘lladi. Bu haqda TIV matbuot xizmat xabar qilmoqda. 

O‘zbekiston TIV rahbari, O‘zbekiston va Yaponiya o‘rtasida diplomatik aloqalar o‘rnatilganining 25 yilligi munosabati bilan hamkasbini qutlagan. Abdulaziz Kamilovning mamnuniyat bilan ta'kidlashicha, o‘tgan davr mobaynida mamlakatlarimiz o‘rtasida ikki va ko‘p tomonlama munosabatlarning barcha jabhalari bo‘yicha 2002 yilda qabul qilingan Do‘stlik, strategik sheriklik va hamkorlik to‘g‘risidagi qo‘shma bayonot ruhida ochiq va samarali siyosiy muloqot o‘rnatilgan.

Maktubda qayd etilishicha, 2015 yil oktabr oyida Yaponiya Bosh vaziri Sindzo Abening O‘zbekistonga rasmiy tashrifi muvaffaqiyatli o‘tishi O‘zbekiston-Yaponiya munosabatlarining yuqori darajada ekanligini yana bir bor ko‘rsatgan hamda savdo-iqtisodiy, moliyaviy-investitsion, ilmiy-texnologik va madaniy-gumanitar sohalardagi hamkorlikni bundan buyon ham rivojlantirishga yangi sur'at baxsh etgan.

Shu bilan birga, O‘zbekiston tomoni mamlakat iqtisodiyoti va ijtimoiy sohasini modernizatsiya qilish, ishlab chiqarish quvvatlarini shakllantirish, energetika, infratuzilma, telekommunikatsiya va boshqa yo‘nalishlarni rivojlantirish bo‘yicha yirik loyihalarni amalga oshirishda Yaponiya tomonidan ko‘rsatilayotgan yordamni yuqori baholashi ta'kidlangan. 

O‘zbekiston tashqi ishlar mahkamasi rahbari madaniy-gumanitar sohadagi aloqalar izchil rivojlanayotgani va mustahkamlanayotganini qayd etar ekan, O‘zbekiston tomoni hamkorlikni, ayniqsa ta'lim, sog‘liqni saqlash va turizm sohalaridagi aloqalarni kengaytirishga qiziqish bildirayotganini ma'lum qilgan.

Abdulaziz Kamilov Yaponiya O‘zbekistonning sinalgan do‘sti va ishonchli hamkoriga aylanganini qat'iy ishonch bilan aytish mumkinligini ta'kidlash barobarida, ikki vazirning o‘zaro sa'y-harakati bilan O‘zbekiston va Yaponiya o‘rtasidagi an'anaviy do‘stona munosabatlar va startegik sheriklik ikki mamlakat xalqlari farovonligi yo‘lida bundan keyin ham har tomonlama rivojlanishiga umid bildirgan.