Useyn Bolt 2008 yilgi Olimpiadada yutgan oltin medalini qaytarib berdi

Yamaykalik sprinter Useyn Bolt Pekindagi 2008 yilgi Olimpiadada 4x100 m estafeta yugurishda milliy terma jamoa safida qo‘lga kiritgan oltin medalini uning jamoadoshi Nesta Karterning doping-namunasi ijobiy chiqqani sababli Xalqaro Olimpiya qo‘mitasiga qaytarib berdi. Bu haqda Reuters axborot agentligi xabar bermoqda.

"Albatta, medalni qaytarib berish xush kelmaydi, biroq XOQ shuni talab qilmoqda. Shuning uchun men medalni qaytarib berdim", deb aytgan Bolt.

25 yanvarda XOQ Karter namunasida metilgeksanamin moddasi aniqlangani sabab Pekin Olimpiadasida oltin medalni qo‘lga kiritgan Yamayka terma jamoasi natijasini bekor qildi. Keyinroq Karter XOQ qarori ustidan Sport hakamlik sudiga shikoyat arizasi berishi ma'lum bo‘lgan.

Bolt estafetada qo‘lga kiritilgan g‘alabasi evaziga 9 karra Olimpiya chempioni hisoblanardi. Natija bekor qilingandan keyin Boltning oltin medallari bittaga kamaydi va u yengil atletikachilar orasida 9 tadan oltin medal qo‘lga kiritgan amerikalik sprinter Karl Lyuis va finlyandiyalik yuguruvchi Nurmi Paavo bilan bu boradagi birinchilikni bo‘lishishni qo‘ldan chiqardi. 

Endi bu oltin medal Trinidad va Tobago terma jamoasiga beriladi, kumush medallar esa yaponiyalik sportchilarga, bronza medallari esa braziliyaliklarga nasib qiladi.