O‘zbekiston Tashqi ishlar vaziri AQSh Davlat kotibiga maktub yo‘lladi

O‘zbekiston Respublikasi Tashqi ishlar vaziri Abdulaziz Komilov Reks Ueyn Tillersonni uning Amerika Qo‘shma Shtatlari Davlat kotibi lavozimiga rasman kirishganligi munosabati bilan tabrikladi. Bu haqda O‘zbekiston Respublikasi Tashqi ishlar vazirligi matbuot xizmati xabar berdi.

Tabrik maktubida Reks Ueyn Tillersonning yangi lavozimdagi ko‘p qirrali faoliyati tinchlik va barqarorlikni mustahkamlash, xalqlar o‘rtasidagi hamjihatlikni barqaror rivojlantirish va chuqurlashtirishda har tomonlama ko‘mak berishiga ishonch bildirilgan. 

“O‘zbekiston kelgusida ham Amerika Qo‘shma Shtatlari bilan hamfikrlilik, o‘zaro hurmat va foyda, bir-birining manfaatlarni hisobga olish tamoyillariga asoslangan har taraflama hamkorlikni rivojlantirish hamda savdo-iqtisodiy, investitsiya, texnologiya va gumanitar sohalardagi mustahkamlanib borayotgan sherikchilikni har tomonlama rag‘batlantirish, fuqarolik jamiyatini shakllantirish masalalari yuzasidan konstruktiv muloqotni to‘laqonli qo‘llab-quvvatlashga qat'iy ahd qilgan”, - deb ta'kidlanadi tabrik maktubida.