«Real»dan «kambek», o‘ziga kelayotgan «Barselona», Ranerisiz qolgan Angliya va haftaning boshqa yorqin lahzalari

Ranerisiz qolgan Angliya
Uik-end boshlanishi arafasida Angliyada shov-shuvli xabar tarqaldi. 9 oy muqaddam millat qahramonidek qarshi olingan Klaudio Raneri iste'foga chiqarildi. Uning «Lester» bilan xayrlashuv so‘zlari juda ta'sirli chiqdi. Italiyalik Tsezarning iste'fosida ko‘pchilikni ayblashdi. Futbolchilar o‘zlariga qo‘yilgan ayblovlarni rad etib chiqdi. Hozirda Lester o‘tmishining qahramoni o‘rniga nomzodlar ko‘rib chiqilmoqda.

«Chelsi» esa barchasiga e'tibor bermagan holda navbatdagi g‘alabasini tantana qildi. «Tottenhem» «Manchester Siti»ning dam olishidan foydalanib, yirik hisobdagi g‘alaba evaziga 2-o‘ringa ko‘tarilib oldi. Uchrashuv qahramoni Harri Keyn o‘zi uchun tarixiy yubileyni qayd etdi.

«Manchester Yunayted» esa bu haftada Liga kubogi finalida «Sauthempton»ga qarshi maydonga chiqib, Zlatan Ibrahimovichning ajoyib o‘yini evaziga g‘alaba qozondi va bosh sovrinni beshinchi marta o‘ziniki qilib oldi. Aytgancha bu o‘yinda ham hakamlarga yetarlicha savollarni keltirib chiqardi. Andre Marriner va uning yordamchisi Manolo Gabbyadinining «toza» golini hisobga olmadi.

«Bavariya» uchun «bir qop» «Hamburg»
«Bavariya» hujumni yaxshi ko‘radigan Gvardioa qo‘l ostida bo‘ladimi, yoki 1:0, 2:1 hisobida yutishga o‘rganib qolgan Anchelotti bilan bo‘ladimi farqi yo‘q — «Hamburg»ga qarshi xumoridan chiqqunicha gol uradi. So‘nggi yillarda, 9:2, 5:0 kabi hisoblarda yengilgan «Hamburg»ga qarshi uchrashuvda bu safar myunxenliklar sakkizta javobsiz to‘p kiritishdi. Ajoyib g‘alaba yoniga Noyyer afsonaviy darvozabon Oliver Kanning rekordini yaxshilab, o‘zgacha tuhfa qo‘shib qo‘ydi.

Shuningdek, bu haftada «Leyptsig» ham, «Borussiya» Dortmund ham g‘alaba qozonishdi. YeChL uchun yana bir da'vogar «Hoffenhaym» esa 22 uchrashuvda 11-durangini rasmiylashtirdi. 

Yolg‘izoyoq «zebra» va taslim bo‘lmayotgan rimlik «bo‘rilar»
Italiyada hammasi oddiy davom etmoqda. «Yuventus» navbatdagi g‘alabasini qo‘lga kiritadi. O‘xshab qolsa, ta'qibchilar ham bu ishni davom ettiradi, bo‘lmasa, oradagi farq kun o‘tgan sari ko‘payib boraveradi. Bu safar «Napoli» relsdan chiqib ketdi. Jamoa o‘z uyida kutilmaganda «Atalanta»ga imkoniyatni boy berdi va endi chempionlik haqida umid qilmasa ham bo‘lishini tushunib yetdi. «Roma» esa A seriyadagi eng muhim uchrashuvda g‘alaba qozona olgani tahsinga sazovor. Jamoa bugungi «Yuventus»ga qarshilik qila olishi mumkin bo‘lgan yagona jamoa bo‘lib qolmoqda.

Darvoqe, yevrokubok yo‘llanmalari uchun kurashayotgan «Milan» va «Latsio» ham bu turda g‘alaba qozonishdi. Italiyada chempionlikdan ko‘ra aynan yevrokuboklar yo‘llanmasi uchun kurash qiziqarli o‘tishi aniq bo‘lib bormoqda.

Fransiya — yetakchilar poygasi avj olgan maskan
Fransiyada yetakchilar chempionlik uchun poygani boshlab yuborishdi. Bu safar uch yetakchi ham g‘alaba qozondi. «Monako» «Gengam» uyida g‘alaba qozongan bo‘lsa, «PSJ» fransuzcha «klasiko»da «Marsel»ni butunlay tor-mor keltirdi. Bungacha esa «Nitstsa» Mario Balotellisiz uch ochkoni qo‘lga kiritib bo‘lgandi.