Turkiya Niderlandiyaga o‘z vazirlarining ushbu mamlakat hududiga kiritilmagani bo‘yicha ikkita norozilik notasi yo‘lladi. Bu haqda Turkiya TIV ma'lumotiga asoslangan holda Anadolu axborot agentligi xabar bergan.
Yuborilgan notalardan birida Turkiya tovon talab qilish huquqini o‘zida saqlab qolishi qayd etilgan.
Turkiya TIV turkiyalik vazirlar va mamlakat fuqarolariga munosabatlarda yo‘l qo‘yilgan qoida buzilishlarini tekshirishga chaqirgan. Notada shu holatlar yuzasidan ma'muriy va jinoiy xarakterdagi choralar ko‘rilishi, yakunda Turkiya TIVni natijalardan boxabar etish so‘ralgan.
Shuningdek, Turkiya o‘z vazirlariga ko‘rsatilgan munosabatni qattiq qoralagan. Qayd etilishicha, Niderlandiya hukumati qarorlari diplomatik etiketdan hamda umum tomonidan qabul qilingan xalqaro normalardan yiroqdir.
«Turkiya Niderlandiyaning xat orqali rasman uzr so‘rashini kutmoqda», - deyilgan hujjatda.
