Meksikada bedarak yo‘qolganlar soni 30 ming kishigacha yetdi

Meksikada asosan jinoiy guruhlar harakatlari oqibatida bedarak yo‘qolganlar soni 2016 yil oxiriga kelib deyarli 30 ming kishini tashkil qildi. Bu haqda Meksikaning inson huquqlari bo‘yicha milliy komissiyasi ma'lum qildi.  

2013 yil oxirida bu ko‘rsatkich 26 ming kishini tashkil qilgandi.

"O‘g‘irlanganlar yoki bedarak yo‘qolganlarning milliy ro‘yxatida 2016 yil oktabr holatiga ko‘ra, 29,9 ming holat ma'lum qilingan. Ulardan 82,71 foizi 11 shtatga to‘g‘ri kelmoqda", deyilgan komissiyaning tvitterdagi xabarida. 

Odamlarning eng ko‘p miqdorda bedarak yo‘qolishi Tamaulipas shtatida qayd qilingan. Bu shtat AQShga yaqinligi sababli zo‘ravonlik darajasi yuqoriligi bilan ajralib turadi. Hozirda bu shtatda 5,5 mingdan ko‘proq odam bedarak yo‘qolgan deb hisoblanmoqda. Odamlar yo‘qolishi bo‘yicha 2- va 3-o‘rinni Mexiko (2,9 mingdan ko‘proq) va Xalisko (2,5 mingdan ko‘proq) shtatlari egallamoqda.

Komissiya, shuningdek, oxirgi 10 yil ichida mamlakatda 855 ta yashirin qabr aniqlangani va u yerdan 1,5 ming kishining suyaklari chiqarib olinganini ma'lum qildi. Jasadlardan 800 nafarining kimga tegishli ekani aniqlangan.