United Airlines rahbari yo‘lovchilar bilan bog‘liq mojarolar sababli jazolanadi

AQShning United Airlines rahbari Oskar Munos yo‘lovchilarning reyslardan olinishi bilan bog‘liq mojarolar sababli 2018 yilda xizmat pillapoyasi bo‘ylab ko‘tarilmaydi va direktorlar kengashini boshqarmaydi. 2017 yil Munos uchun o‘z lavozimidagi oxirgi yil bo‘ladi. Shunday tuzatishlar uning mehnat shartnomasiga kiritildi. Bu haqda aviakompaniya tegishli bo‘lgan United Continental xoldingi bayonotiga iqtibos keltirgan holda Reuters axborot agentligi xabar bermoqda. 

Shuningdek, kompaniya Munosga 2017 yil natijalariga ko‘ra beriladigan bonuslar miqdorini ham qayta ko‘rib chiqadi. Munos 2016 yilda 18,72 mln dollar ishlab topgandi. "United Airlines boshqaruvi va direktorlar kengashi yaqinda bo‘lib o‘tgan voqealarni jiddiy qabul qildi va hozir mukofotlashlar dasturiga tuzatish tayyorlamoqda. Dastur 2017 yilda aviakompaniya xodimlarini rag‘batlantirish choralari mijozlarga xizmat ko‘rsatishni yaxshilash bilan bevosita va aniq bog‘liq bo‘lishiga qaratilgan", deyildi bayonotda. 

Eslatib o‘tamiz, 9 aprelda Chikagodan Luisvillga 3411-reysi jo‘natilishi oldidan United Airlines xavfsizlik xodimlari yo‘lovchilarga ulardan 4 nafari samolyotni tark etishlariga to‘g‘ri kelishini, chunki samolyotga ortiqcha chiptalar sotilganini aytishgan. Samolyotni ko‘ngilli tarzda tark etishni istaganlarga tovon puli taklif qilingan. Biroq samolyotni tark etishni istovchilar topilmagandan keyin aviakompaniya xodimlari o‘zlari 4 nafar yo‘lovchini tanlab olishgan. Ulardan 3 nafari samolyotni tark etishga rozi bo‘lgan, biroq yana bir "ortiqcha yo‘lovchi", 69 yoshli shifokor bunga rozi bo‘lmagan. Shunda aviakompaniya xodimlari kuch ishlatib, uni samolyotdan tushirib yuborishgan. Buning oqibatida xitoy millatiga mansub keksa erkakka jarohat yetkazilgan.   

Ushbu voqeadan bir hafta o‘tgach, Kosta-Rikaga o‘z nikohini nishonlangani ketayotgan juftlik ham ushbu aviakompaniya samolyotidan tushirib yuborilgan. Bunga esa Maykl Xol va uning qallig‘i Amber Maksvel samolyotdagi o‘z o‘rindiqlaridan boshqa bo‘sh o‘rindiqlarga o‘tirishgani sabab bo‘lgan. Aniqlanishicha, ular o‘tirgan o‘rindiqlar shinamroq bo‘lgani sababli qimmatroq bo‘lgan. Oqibatdaa juftlik samolyotdan tushirib yuborilgan.