«Real» yana «Atletiko»dan kuchli. Zidan va jamoa Kardiffga boradi

10 may oqshomida YeChL yarim finali doirasidagi javob uchrashuvida«Atletiko» «Real»ni 2:1 hisobida mag‘lub etdi, ammo Zinedin Zidan shogirdlari ikki uchrashuv natijasiga ko‘ra, (bir hafta oldingi uchrashuvda 3:0 hisobi qayd etilgandi) finalga chiqdi va 3 iyun kuni Kardiffdagi «Millenium» stadionida «Yuventus»ga qarshi o‘ynaydigan bo‘ldi.

«Visente Kalderon» stadionidagi oxirgi xalqaro o‘yin

«Atletiko» – «Real» derbisi «Visente Kalderon» stadionida o‘tkazilgan oxirgi xalqaro miqyosdagi uchrashuv bo‘lib qoldi. Jamoa boshqa zamonaviy stadion qurmoqda va Ispaniya chempionatida mavsum yakunlangach, bu stadion buzib tashlanadi.

O‘yindan oldin birinchi o‘yin natijasidan kelib chiqqan holda ko‘pchilik Diyego Simeone jamoasining finalga yo‘l olishiga ishonch bildirmayotgandi, ammo murabbiy «Atletiko» oxirgi daqiqagacha final uchun kurashishini va'da qildi.

— Biz o‘zimizga va kuchimizga ishonamiz, – degandi Simeone o‘yinoldi matbuot anjumanida. – Javob uchrashuvi oldidan o‘zgarishlar qilmoqchi emasmiz. Biz o‘zimizning nimalarga qodirligimizni yaxshi bilamiz. Men o‘z futbolchilarimga to‘la ishonaman, ular yaxshi futbol namoyish etib berishadi. Biz maydonda o‘z ustunliklarimizdan foydalanmog‘imiz lozim. Men o‘z futbolchilarim orasida bu o‘yinning mohiyatini tushunmaydiganlar bo‘lishini istamayman. Bizning o‘z ustun jihatlarimiz bor, shular evaziga bu og‘ir vazifani uddalashga urinib ko‘ramiz. Hakam hushtagini chalmagunicha taslim bo‘lish yo‘q. Agar futbolchilarimni «Real»ga qarshi ruhlantira olmasam, demak o‘z ishimni yaxshi uddalamayotgan bo‘laman.

Zidan yirik hisobda yutqazmadi

Zinedin Zidan «Real» bosh murabbiyi bo‘lganidan buyon 3ta gol farqi bilan yutqazmagan. Jamoaning YeChLdagi eng yirik mag‘lubiyati o‘tgan mavsumda kuzatilgan, o‘shanda «qaymoqranglilar» jamoasi Germaniyada «Volfsburg»ga 0:2 hisobida yutqazgandi. O‘shanda «Real»ga Krishtianu Ronalduning javob uchrashuvida urgan het-trigi yordam bergan va jamoa keyin muvaffaqiyatli yurishini davom ettirib, chempionga aylangandi. «Krishtianu Ronalduning het-trigi» bu mavsumda «matraschilar»ni yo‘lda qoldiradigan bo‘ldi. Portugaliyalik bu hujumchi 8 kun oldin «Atletiko»ga qarshi birinchi uchrashuvda 3 gol urib, javob o‘yini oldidan ko‘p narsaga oydinlik kiritib qo‘ygandi. Bu o‘yindan oldin Simeone oldida qiyin vazifa turgandi: «Real»ga kamida 3ta gol urish muhimroqmi yoki Ronalduga erkin harakatlanish imkonini bermaslikmi? «Oltin to‘p»ning to‘rt karra sohibi o‘z imkoniyatiga qachondir ega bo‘lishi tayin edi. «Atletiko» bu o‘yinda o‘z jarima maydoni atrofida diqqatni bir daqiqaga ham yo‘qotmasligi kerak edi. Talab qattiq edi.

Mezbonlarga standart va penalti yordamga keldi

Maksimal darajada yuqori temp, raqib jarima maydoniga tajovuzkor pressing, uzun paslar va standart vaziyatlar – «Atletiko» taklif etadigani shular edi. 4-daqiqada mehmonlar o‘ng qanot himoyachisi Danilo – «Real» tarkibidagi eng zaif nuqta - ilk sariq kartochkani oldi. Endilikda «matraschilar» Daniloning qanotiga bosimni kuchaytirishi kutildi, ammo ular Marseloning qanotiga ko‘proq e'tibor qaratishdi. Shu tomondagi burchakdan to‘p uzatilganida Saul aniq harakat qilib, «Atletiko»ni hisobda oldinga olib chiqdi. Simeonening eski fishkasi ishladi –  darvoza to‘siniga yaqinlatib to‘pni uzatish. Saul bosh bilan to‘pni darvoza to‘riga yo‘naltirdi va «Visente Kalderon»dagi hayqiriqlarni yanada yaxshiroq eshitish uchun qo‘llarini quloqlariga qo‘yib muxlislar tomon chopdi. Bu vaqtda hali o‘yinning 12-daqiqasi o‘tib borayotgandi.

«Real» – «Yuventus» emas, bu jamoa hisobni soatlab saqlab tura oladigan jamoa emas. Zidan jamoasi himoyada xatolar qilishda davom etdi va «Atletiko»dan to‘pni olib qo‘ya olmadi. Birinchi goldan ko‘p o‘tmay ikkinchisi ham keldi. O‘yin hakami Junayt Chaqir avvaliga Serxio Ramos Yannik Ferreyra-Karraskoni yiqitganida penalti belgilamadi, ammo Rafael Varan Fernando Torresni ochiqchasiga yiqitganida 11 metrlik nuqtani ko‘rsatishga majbur bo‘ldi, Antuan Grizmann esa hisobdagi ustunlikni oshirdi, 16 daqiqadayoq hisob 2:0 ko‘rinishiga keldi.

«Atletiko» 5 daqiqa chiday olmadi

Ronalduni mezbonlar to‘la zararsizlantirishga erishishdi. «Atletiko» o‘z pressingi bilan portugaliyalik futbolchini sheriklaridan uzib qo‘ydi, birinchi bo‘limda Krishtianu o‘zini ko‘rsata olmadi. Simeone shogirdlari 2:0 hisobidan keyin biroz tin olish uchun himoyaga qaytishganida ham «Real» hujumchisini xavfli pozitsiyada qoldirishmadi. Ronaldu Yan Oblak darvozasi tomoni ikki marta zarba berdi, ulardan birini Stefan Savich hali jarima maydoniga kirmasidanoq to‘sdi.

Agar «matraschilar» tanaffusgacha chidab, hisobni saqlab qolishganida, ikkinchi bo‘lim boshidan yana hujumga o‘tib, muvaffaqiyatni davom ettirishlari mumkin edi. Voqealar rivoji shunday davom etsa, ularda ikkinchi bo‘lim boshidayoq hisobni 3:0 ko‘rinishiga keltirish imkoni mavjud edi. Ammo ularga 5 daqiqa yetmadi. «Atletiko» futbolchilari bo‘shashishdi va ular Ronaldudan xavf kutishayotganida, Karim Benzema katta sahnaga chiqdi: fransuz futbolchisi chap qanotdan reyd uyushtirdi va nozik fintlari bilan raqibning 3 himoyachisini ortda qoldirib ketdi. Bu vaziyatda «Atletiko» himoyachilari tarqoq holatga tushdi, Benzama to‘pni zarba berish nuqtasidagi Toni Kroosga uzatdi, u pastlatib bergan zarbani Oblak qaytardi, ammo mezbonlar himoyachilari bir-biriga xalaqit qilish bilan band bo‘lganida Isko xotirjamlik bilan to‘pni darvoza to‘riga joyladi.

Zizu «Yuventus»ga qarshi

«Atletiko» jamoasi bosh murabbiyi ikkinchi bo‘lim boshida 10 daqiqa davomida hujumlar samara berishini kutdi. Ammo jamoasi tezkor gol ura olmagach u ikki o‘zgarishni amalga oshirdi, Kevin Gameyro va Tomas Teyye maydonga tashlandi. Ular Fernando Torres va Ximenesni almashtirishdi. Ammo ular «matraschilar»ning hujumlarini kuchaytirib qo‘yishmadi. «Real» uchun xavf ortda qolgandi. «Qaymoqranglilar» jamoasi o‘yinni nazorat qila boshlashdi, Ronalduda gol urish uchun ko‘proq imkoniyat yuzaga kela boshladi.

Simeone aldamagandi: «Atletiko» futbolchilari hakamning o‘yinni yakunlovchi hushtagi yangramagunicha kurashni davom ettirishdi. Bu jamoa o‘zining fantastik xarakterini yana bir bor namoyish etdi! Ammo «Real», Chempionlar ligasidagi avvalgi mavsumlarda bo‘lgani kabi qo‘shnilaridan kuchliroq bo‘lib chiqdi. «Visente Kalderon» Yevropa bilan xayrlashuvi kunida boshqaning bayramiga guvoh bo‘ldi.

Endilikda «Real» «Yuventus» bilan hal qiluvchi bahsda maydonga tushadi. Bunday final 1998 yildan buyon kuzatilmagan, o‘shanda «qaymoqranglilar» jamoasi Predrag Miyatovichning goli evaziga Turin jamoasini 1:0 hisobida mag‘lub etgandi. O‘sha kuni «Yuventus» tarkibida Zidan ham o‘ynagandi…