Bugun Makedoniya poytaxti Skopeda Yevropa superkubogi bosh sovrini uchun YeChL g‘olibi sifatida «Real» va Yevropa Ligasi bosh sovrini egasi sifatida «Manchester Yunayted» jamoalari maydonga tushib keladi. Tribuna.Uz uchrashuvga oid barcha ma'lumotlarga batafsil to‘xtalib o‘tadi.
Yevropa superkubogi.
«Real Madrid» - «Manchester Yunayted»
Toshkent vaqti bilan 23:45
Translyatsiya: Match! Futbol 1
Superkubok statistikasi
«Real» Yevropa superkubogi finalida oltinchi marta maydonga tushmoqda. Shularning 3tasida jamoa sovrinni yutib olgan bo‘lsa, ikki marta imkoniyat boy berilgan.
«Manchester Yunayted» esa Superkubok finallarida shu kunga qadar uch marta o‘ynagan va faqat bir marta bosh sovrinni qo‘lga kiritgan.
O‘yinoldi qiziqarli faktlar
- «Madrid» yevrokuboklardagi so‘nggi 18 uchrashuvning faqat bittasida (o‘tgan mavsum YeChL yarim finalida «Atletiko Madrid»ga qarshi safar o‘yinida 1:2 hisobida (umumiy hisob 4:2, «Real» foydasiga) yutqazgan. 12 g‘alaba, 5 durang.
- «Qaymoqranglilar» premer-liga jamoalariga qarshi so‘nggi 10 uchrashuvda biror marta ham yutqazmagan (7G‘, 3D). So‘nggi marta jamoa «Liverpul»ga 2008/2009 yilgi mavsumda 0:4 hisobida mag‘lubiyatga uchragandi. Bu klubning YeChL davridagi eng yirik mag‘lubiyati sanaladi.
- So‘nggi marta «Real» «MYu»ga qadar 2015/16 yilgi mavsum yarim finalida «Manchester Siti» bilan o‘ynagan va Manchesterda 0:0 («Real»ning oxirgi golsiz o‘yini), Madridda esa 1:0 hisobida mezbonlar g‘alaba qozongan.
- «Real»ning ingliz klublariga qarshi umumiy statistikasi quyidagicha: 34 o‘yin, 14 g‘alaba, 10 durang, 10 mag‘lubiyat, To‘plar nisbati: 48-38.
- Ispan jamoasining finallarda Angliya jamoalariga qarshi uchrashuvlari mutlaqo omadsiz chiqqan. «Real» ingliz jamoalari bilan final uch marta o‘ynagan, uchta mag‘lubiyat: «Chelsi»ga qarshi 1970/71 yil Kubok egalari kubogi va 1998 yilgi Yevropa Superkubogi va 1980/81 yilgi mavsumda «Liverpul»ga imkoniyat boy berilgan.
- «Yunayted» yevrokuboklarning (Yevropa ligasining) so‘nggi 11 uchrashuvidan buyon mag‘lubiyatga uchramay kelmoqda (8G‘, 3D). So‘nggi marta jamoa o‘tgan mavsum guruh bosqichi 4-turida «Fenerbahche»ga 1:2 hisobida yutqazgandi.
- Mankunianlar ispan klublariga qarshi so‘nggi 10 o‘yinning faqat ikkitasida g‘alaba qozongan 4 durang, 4 mag‘lubiyat. So‘nggi marta «Yunayted» o‘tgan mavsum yarim finalda «Selta»ni mag‘lubiyatga uchratgandi.
- «Yunayted» jami La-liga jamoalariga qarshi 49 uchrashuv o‘tkazib, 13g‘alaba, 20 durang, 16 mag‘lubiyatga uchragan. To‘plar nisbati 61-68.
- «Yunayted» ispan klublariga qarshi uch marta finalda to‘qnash kelgan bo‘lsa, uchchalasida ham raqib «Barselona» bo‘lgan. 1990/91 yilgi YeChK kubogida ingliz jamoasining qo‘li baland kelgan bo‘lsa, 2008/09 (2:0) va 2010/11 yilgi (3:1) finallarda «Barselona» bosh sovrinni qo‘lga kiritgan.
Yo‘qotishlar
«Real» tarkibida yo‘qotishlar yo‘q. Birgina Krishtianu Ronalduning jamoa mashg‘ulotlariga qo‘shilganiga endigina 4 kun bo‘lganini hisobga olsak, madridliklarning asosiy hujumchisi zaxirada qolishi mumkinligini anglatadi.
«Manchester Yunayted» tarkibida esa yo‘qotishlar ko‘p. Markaziy himoyachilar Erik Bayi va Fil Jons diskvalifikatsiya tufayli bu uchrashuvni o‘tkazib yuborsa, Markos Roxo (tizza), Lyuk Shou (oyoq) va Eshli Yang (tizzaosti paylari) jarohati sabab uchrashuvni o‘tkazib yuboradi.
Taxminiy tarkiblar:
«Real Madrid»: Navas, Karvaxal, Ramos, Varan, Marselo, Modrich, Kazemiro, Kroos, Isko, Benzema, Beyl.
«Manchester Yunayted»: De Xea, Valensiya, Lindelyof, Smolling, Blind, Errera, Matich, Pogba, Mxitaryan, Reshford, Lukaku.
O‘yinga tayyorgarlik
«MYu» bu o‘yinga qadar mavsumoldi yig‘in doirasida 7ta o‘yin o‘tkazdi: 5 g‘alaba (4 o‘yinda+1 penaltilar seriyasidagi g‘alaba) 1 durang, 1 mag‘lubiyat. Jumladan «Real» aynan penaltilar seriyasiga ko‘ra mag‘lub etildi.
«Real»esa AQShdagi yig‘in doirasida jami 4 uchrashuv o‘tkazdi va ularning birortasida 90 daqiqa davomida g‘alaba qozona olmadi: 1 g‘alaba (penalti seriyasidan), 3 mag‘lubiyat (1ta penaltilar seriyasidan).
