Jismoniy tarbiya institutida shu yildan sirtqi bo‘lim tashkil etiladi

O‘zbekiston Respublikasi Prezidenti Shavkat Mirziyoyev 2017 yil 10 avgustda “O‘zbekiston davlat jismoniy tarbiya instituti faoliyatini yanada takomillashtirish chora-tadbirlari to‘g‘risida”gi qarorni imzoladi.

Qaror bilan O‘zbekiston davlat jismoniy tarbiya institutida 2017/2018 o‘quv yilidan boshlab ta'limning sirtqi bo‘limi tashkil etilishiga rozilik berildi.

O‘zbekiston Respublikasi Oliy va o‘rta maxsus ta'lim vazirligi, Jismoniy tarbiya va sport davlat qo‘mitasi yangi o‘quv yili boshlangunga qadar O‘zbekiston davlat jismoniy tarbiya institutida tashkil etiladigan ta'limning sirtqi shakli bo‘yicha o‘quv reja va dasturlarni ishlab chiqadi va amaliyotga joriy etadi.

O‘zbekiston davlat jismoniy tarbiya institutida tahsil olayotgan sport turlari bo‘yicha O‘zbekiston milliy terma jamoasi a'zolari, terma jamoa a'zoligiga nomzodlarga ularning xohish-istaklariga ko‘ra o‘qish muddati hamda kursi saqlangan holda ta'limning sirtqi shakliga o‘tkazishga ruxsat berildi.