Xususiy uy-joy mulkdorlari shirkatlari ta'mirlash ishlari uchun badallarning 80 foizigacha yo‘naltiradi

Vazirlar Mahkamasining 1.08.2017 yildagi 570-son qarori bilan Ko‘p kvartirali uylarni kapital va joriy ta'mirlash uchun mablag‘larni to‘plash va ulardan foydalanish tartibi to‘g‘risidagi nizom tasdiqlandi. Bu haqda Norma.uz yozmoqda.
 
Hujjat bilan o‘rnatilishicha,  XUMShga banklarda ko‘p kvartirali uylarni kapital va joriy ta'mirlashni amalga oshirish uchun 20412 — «Nodavlat notijorat tashkilotlarining jamg‘arma depozitlari» hisobvarag‘i (keyingi o‘rinlarda – to‘plash hisobvarag‘i) ochiladi.
 
To‘plash hisobvarag‘iga quyidagi manbalardan mablag‘lar kelib tushadi:

a) turar va noturar joy mulkdorlarining majburiy badallaridan shakllangan mablag‘lar;
b) ko‘p kvartirali uylarning tashqi fasadi, tom va yerto‘la qismlari hamda boshqa ijaraga berilgan maydonlar uchun ijarachilardan kelib tushadigan mablag‘lar;
v) ko‘p kvartirali uylarning umumiy foydalanish joylari va muhandislik kommunikatsiyalarini kapital va joriy ta'mirlash hamda lift uskunalarini ta'mirlash va almashtirish uchun Qoraqalpog‘iston Respublikasi, viloyatlar va Toshkent shahri mahalliy byudjyetlari mablag‘lari, shu jumladan yil boshidagi qoldiq bo‘sh mablag‘lar va I–III chorak yakunlari bo‘yicha oshirib bajarilgan daromad qismi, shuningdek Uy-joy kommunal xizmat ko‘rsatish vazirligining Uy-joy kommunal xo‘jaligini rivojlantirish jamg‘armasi mablag‘lari, Qoraqalpog‘iston Respublikasi Vazirlar Kengashi, viloyatlar va Toshkent shahri hamda tuman (shahar) hokimliklari tomonidan jalb qilinadigan byudjyetdan tashqari mablag‘lar;
g) ko‘p kvartirali uylarni kapital va joriy ta'mirlash uchun yuridik va jismoniy shaxslarning homiylik xayriyalari;
d) qonun hujjatlarida taqiqlanmagan boshqa manbalardan tushadigan mablag‘lar.
 
Bunda kapital va joriy ta'mirlash uchun 2 manba – mulkdorlarning majburiy badallari va ijaradan tushadigan mablag‘lardan mablag‘lar ajratishning aniq me'yorlari ko‘p kvartirali uyning haqiqiy holatini hisobga olgan holda har bir alohida XUMSh bo‘yicha 30 dan 80%gacha miqdorda belgilanadi. Me'yor Uy-joy kommunal xizmat ko‘rsatish vazirligining tuman (shahar) bo‘limlari bilan, agar kredit mablag‘lari hisobidan amalga oshirilsa, tijorat banki bilan ham kelishiladi. Me'yor XUMShning umumiy yig‘ilishi qarori bilan tasdiqlanadi
 
Belgilangan me'yorlardan ortiq to‘plash hisobvarag‘iga tushgan ko‘rsatilgan mablag‘lar bank tomonidan XUMShning asosiy hisobvarag‘iga memorial order orqali o‘tkaziladi va shirkat tomonidan  mustaqil ravishda tasarruf etiladi. Boshqa manbalardan tushadigan mablag‘lar to‘liq to‘plash hisobvarag‘iga o‘tkaziladi va XUMShning asosiy hisobvarag‘iga yo‘naltirilmaydi.
 
XUMSh ko‘p kvartirali uyning har bir kvartirasiga shaxsiy hisobvaraq ochadi. Shaxsiy hisobvaraqda XUMSh nomi, ko‘p kvartirali uy raqami, kvartira raqami va uy-joy mulkdori shaxsi to‘g‘risidagi ma'lumotlar, to‘langan mablag‘lar summasi, sarflangan mablag‘lar summasi va qoldiq summa ko‘rsatiladi.
 
To‘plash hisobvarag‘idagi mablag‘lardan quyidagi maqsadlarda foydalanishga ruxsat etiladi:

a) ko‘p kvartirali uylarni kapital va joriy ta'mirlash uchun «Ta'mirlash-tiklash xizmati» DUK yoki boshqa pudrat tashkilotining maxsus hisobvarag‘iga o‘tkazib berish;
b) ko‘p kvartirali uylarni kapital va joriy ta'mirlash uchun olingan kreditlarni va ular bo‘yicha hisoblangan foizlarni qaytarish.
 
Uy-joy kommunal xizmat ko‘rsatish vazirligi tizimida tashkil etilgan Yagona hisob-kitob markazlari tomonidan XUMShga shartnoma asosida buxgalteriya hisobini yuritish, konsalting xizmatlarni ko‘rsatish va majburiy badallar yig‘ish bo‘yicha ko‘rsatilgan xizmatlar uchun to‘lovlar shirkatning asosiy hisobvarag‘idan amalga oshiriladi.
 
To‘plash hisobvarag‘iga o‘tkazilgan va yil oxirigacha foydalanilmagan mablag‘lar to‘plash hisobvarag‘ida jamlanadi va olib qo‘yilmaydi.
 
Pudrat tashkilotlari XUMSh mablag‘larini 22626 — «Korxona va tashkilotlarning maqsadli mablag‘lari» hisobvarag‘i (keyingi o‘rinlarda – maxsus hisobvaraq) orqali qabul qiladi. Maxsus hisobvaraq mablag‘lari faqat maqsadli ravishda sarflanadi va boshqa maqsadlarga sarflashga ruxsat etilmaydi.
 
Pudrat ishlari yakunlanganidan keyin bajarilgan ishlarning nazorat o‘lchovlari ixtisoslashtirilgan tashkilotlar tomonidan amalga oshiriladi. Oshirib yozilganligi aniqlangan taqdirda, ortiqcha olingan mablag‘lar pudrat tashkilotlaridan undiriladi. Oshirib yozishlar uchun javobgarlikka tortish masalasi qonun hujjatlariga muvofiq hal qilinadi.
 
XUMSh tugatilgan yoki ko‘p kvartirali uylar buzib tashlangan taqdirda, to‘plash hisobvarag‘ida yig‘ilgan va foydalanilmagan mablag‘lar XUMShning umumiy yig‘ilishi qaroriga asosan ularning a'zolariga, ulushlariga mutanosib ravishda taqsimlanadi.