Prezident konservatoriya moddiy-texnik bazasini mustahkamlash bo‘yicha yangi qarorni imzoladi

O‘zbekiston Respublikasi Prezidenti Shavkat Mirziyoyev “O‘zbekiston Davlat konservatoriyasi moddiy-texnik bazasini mustahkamlash bo‘yicha qo‘shimcha chora-tadbirlar to‘g‘risida”gi qarorni imzoladi.

Hujjat bilan Madaniyat vazirligi, Xususiylashtirilgan korxonalarga ko‘maklashish va raqobatni rivojlantirish davlat qo‘mitasi, Iqtisodiyot vazirligi, Moliya vazirligi, Toshkent shahar hokimiyati va “Toshkent” Respublika fond birjasi”ning “Toshkent” Respublika fond birjasi”ga Toshkent shahri, Mustaqillik shoh ko‘chasi, 107 manzilida joylashgan binoning berilishi evaziga Toshkent shahri, Buxoro ko‘chasi, 10 manzilida joylashgan bino va inshootlarni davlatga balans qiymati bo‘yicha berish to‘g‘risidagi taklifi ma'qullandi. 

O‘zbekiston Davlat konservatoriyasiga Toshkent shahri, Buxoro ko‘chasi, 10 manzilida joylashgan bino va inshootlarni boshqarish huquqi berildi. U yerda jahon standartlariga mos bo‘lgan zamonaviy konsert zali barpo etiladi. Bunda “Fond bozorining axborot-resurs markazi” DUK tomonidan egallangan binolar istisno sanaladi.

Xususiylashtirilgan korxonalarga ko‘maklashish va raqobatni rivojlantirish Davlat qo‘mitasi huzuridagi Qimmatli qog‘ozlar bozorini muvofiqlashtirish va rivojlantirish bo‘yicha Markaz boshqaruviga Toshkent shahri, Mustaqillik shoh ko‘chasi, 107 manzilida joylashgan binoning chap qismi birinchi qavati berildi.

Belgilanishicha, “Toshkent” Respublika fond birjasi” AJga berilayotgan bino qismi va davlatga berilayotgan binolar kompleksi balans qiymati o‘rtasidagi tafovut “Toshkent” Respublika fond birjasi” AJga binoni kapital ta'mirdan chiqarish uchun taqdim etiladigan pul mablag‘lari hisobidan qoplanadi.