8312.64 USD -2.21

9456.46 EUR +48.21

125.22 RUB +1.37

10578.7 GBP -23.60

17:20 / 14.03.2018 4595

Швейцария компаниялари Ўзбекистоннинг тўқимачилик соҳасини ҳар томонлама қўллаб-қувватлашга тайёр

Фото: Kun.uz

14 март куни Тошкент шаҳрида "Швейцария тўқимачилик технологиялари" симпозиуми бўлиб ўтди. Унда Швейцариядаги 43 компанияни ўз ичига олган конгломерат вакиллари иштирок этишди. Тадбирда қатнашган KUN.UZ мухбирининг хабар беришича, икки мамлакат ўртасида тўқимачилик соҳасида кенг қамровли ва узоқ муддатли ҳамкорлик алоқалари ўрнатилиши кўзда тутилган. 

Швейцария тўқимачилик соҳаси вакилларининг сўзларига кўра, мамлакатдаги баъзи тўқимачилик корхоналари 200 йиллик тарихга эга бўлиб, бу уларнинг соҳада юқори тажриба ва сифатга эришганидан далолат беради. 

Ўзбекистоннинг текстиль ва тикувчи-тўқимачилик йўналиши иқтисодиётнинг энг барқарор ривожланаётган ва жозибадор соҳаларидан бири ҳисобланади. Мамлакатдаги иқтисодий ўсиш ва аҳоли бандлигини таъминлашда енгил саноатнинг муҳим ролини инобатга олган ҳолда, ҳозирда  жаҳоннинг илғор компаниялари унинг ривожига алоҳида эътибор қаратишмоқда. Сўнгги йилларда ушбу соҳа хорижий капитал иштирокида яратилаётган корхоналар сони ҳамда иқтисодиётнинг реал секторида замонавий ускуналарнинг улуши бўйича етакчилик қилмоқда. 

Швейцария тўқимачилик технологиялари компаниялари Ўзбекистон билан илк ҳамкорлик шартномасини 1993 йилда имзолаган. 2015 йилда мамлакатимизга олиб келинган тўқимачилик қурилмалари сони 400 тани ташкил қилган, 2016 йилда эса бу кўрсаткич 600 тага етган. 

Швейцария тўқимачилик ускуналари ишлаб чиқарувчилари билан узвий ҳамкорлик Ўзбекистонда тўқимачилик соҳаси олдига қўйилган мақсадларга эришишда муҳим роль ўйнайди. Бугунги кунда мамлакат корхоналарида «Rieter» (йигириш дастгоҳлари),  «Saurer» (тўқув машиналари), «Uster» (лаборатория ускуналари), “Luwa” ва бошқа компаниялар ускуналари ўрнатилган. 

Фото: Kun.uz

Тадбирда таъкидланишича, Швейцариядан Ўзбекистоннинг тўқимачилик соҳаси ривожи учун келтирилаётган ускуналар ўзининг энерго- ва хомашё тежамкорлиги билан ажралиб туради. 

 

Top