Checheniston poytaxti Grozniyda O‘zbekistonning besh fuqarosi mahalliy huquqni muhofaza qilish organlari xodimlari tomonidan rejali reyd tadbirlari davomida qo‘lga olindi. Ular rasmiy ro‘yxatdan o‘tmay yashashgan, bu esa Rossiya Federatsiyasi hududida bo‘lishning qonunchilik bilan o‘rnatilgan rejimini buzish sanaladi.
Bu haqda Rossiya sud ijrochilari federal xizmatining Checheniston Respublikasi bo‘yicha boshqarmasi matbuot xizmati xabar bermoqda.
Sud qo‘lga olingan o‘zbekistonliklarni RFda bo‘lish rejimini buzganlikda aybdor deb topdi, ularga nisbatan 2 ming rubl miqdorida jarima tayinlandi. Shuningdek, ushbu 5 shaxs Rossiyadan chiqarib yuboriladigan bo‘ldi.
Sud ijrochilari tegishli hujjatlar tayyor bo‘lganidan so‘ng qoidabuzarlarni Moskvadagi «Vnukovo» aeroportiga olib borishdi hamda «Moskva-Toshkent» aviareysiga o‘tkazib yuborishgan.
