“Ziyorat” turizmi doirasida londonlik sayyohlar O‘zbekistonga kelishdi

Bugun, 4 aprel kuni “O‘zbekiston havo yo‘llari” MAK ziyorat turizmi doirasida HY202 reysi bilan bir guruh sayyohlarni Londondan Toshkentga olib keldi. Bu haqda MAK matbuot xizmati xabar bermoqda .

Kelib chiqishi bangladeshlik bo‘lgan sayyohlarni Islom Karimov nomidagi “Toshkent” xalqaro aeroportida MAK vakillari hamda ommaviy axborot vositalari kutib olishdi.

Mehmonlar qisqa ekskursiya safari davomida Toshkent, Samarqand va Buxoro shaharlarining tarixiy diqqatga molik joylarini, shuningdek, O‘zbekistondagi Islom dinining muqaddas joylarini ziyorat qilishdi.

- Ajoyib mamlakatingizda o‘zgacha ruh bilan saqlanib kelinayotgan me'moriy yodgorliklar, qadimiy ana'nalar va urf-odatlaringiz haqda ko‘p eshitganmiz va, ayniqsa, o‘zbek xalqining mehmondo‘stligi haqda, - dedi jurnalistlar bilan suhbatda sayohat tashabbuschisi, guruh yetakchisi, Manchester universiteti o‘qituvchisi Mahsud Afzal. – Biz azaldan o‘lkangizga kelish va u bilan tanishishni istar edik. Bugun ana shunday imkoniyat tug‘ilib turganidan bag‘oyat xursandmiz.