Pashinyan boshladi: Yerevanda aeroportga yo‘llar to‘sib qo‘yildi, Mudofaa vazirligi bayonot berdi

Armanistondagi namoyishlar yetakchisi Nikol Pashinyanning tarafdorlari Yerevan aeroportiga yo‘llarni to‘sib qo‘yishni boshlashdi. Bundan namoyishlar o‘tkazilayotgan joydan uzatilayotgan to‘g‘ridan-to‘g‘ri efirdagi kadrlar dalolat bermoqda.

To‘g‘ridan-to‘g‘ri translyatsiyaga ko‘ra, namoyishchilar yo‘llarni har ikki tomondan to‘smoqda. Xodimlar namoyishchilardan yo‘lni tark etishni so‘rashyapti.

Armaniston Mudofaa vazirligi Yerevan va viloyatlar aholisini harbiy transport harakatlanishiga xalaqit bermaslikka chaqirdi. Bu haqda idora matbuot kotibi Artsrun Ovannisyanning xabarida aytiladi.

Idora bayonotida bildirilishicha, mamlakat xavfsizligini ta'minlash lozimligidan kelib chiqqan holda, Armaniston Mudofaa vazirligi va Qurolli kuchlari kechayu kunduzlik rejimda qo‘yilgan vazifalarni to‘laqonli bajarishda davom etmoqda. Shuning uchun butun respublika hududi bo‘ylab harbiy avtomobillar va kolonnalarning harakatlanishiga xalaqit bermaslik so‘ralgan.

Ijtimoiy tarmoqlarda tarqalgan xabarlarga ko‘ra, ayni damda aeroportga yo‘l to‘sib qo‘yilgan. Yerevandagi yo‘l harakati butunlay falaj ahvolda – ko‘chalar, metro, temir yo‘li to‘sib qo‘yildi. Ko‘plab kichik tumanlar va ko‘chalar ham yopib qo‘yildi. Gyumridagi ko‘chalar, Armaniston Ta'lim va madaniyat vazirligi binosi to‘sib qo‘yildi. 

Yerevandagi «Zvartnots» aeroporti xodimlari ham norozilik aksiyalariga qo‘shilgani aytilyapti.