Afg‘onistonda «Tahriq-a Tolibon Pokiston» radikal tashkiloti yetakchisi Mulla Fayzulla yo‘q qilindi. Bu haqda Tolonews manbalarga asosan xabar bermoqda.
Agentlik ma'lumotiga ko‘ra, AQSh harbiy-havo kuchlarining uchuvchisiz uchar qurilmasi chorshanba, 13 iyun kuni Afg‘onistonning Pokiston bilan chegaraga yaqin hududiga zarba bergan. Natijada Fayzulla o‘ldirilgan. Bundan tashqari, guruhning yana to‘rt nafar qo‘mondoni yo‘q qilindi.
AQSh qurolli kuchlarining Afg‘onistondagi vakili, podpolkovnik Martin O`Donnel uchuvchisiz uchar qurilmadan berilgan zarba tufayli terrorchilik tashkiloti yetakchisi o‘ldirilganini tasdiqladi. Biroq, u gap aynan kim haqida ketayotganiga aniqlik kiritmagan.
Eslatib o‘tamiz, avvalroq Afg‘onistonda toliblar vaqtinchalik sulhga qaramay, 17 nafar harbiyni o‘ldirgani xabar qilingandi.
