FHDYo hujjatlariga doir ma'lumotlarni internet orqali olish imkoni paydo bo‘ladi

2021 yilgacha FHDYoning barcha arxiv hujjatlari elektron formatga o‘tkaziladi. KUN.UZ muxbiri Adliya vaziri o‘rinbosari Akbar Toshqulovning 4 iyul kuni Xalqaro Press-klubning "FHDYo: islohotlarning yangi sahifasi yohud byurokratiya va korrupsiyaga qarshi muhim qadam" sessiyasida bergan ma'lumotiga asoslanib, shu haqida xabar berdi.

Uning so‘zlariga ko‘ra, FHDYo arxividagi 60 millionga yaqin hujjatni elektron formatga o‘tkazishga kirishildi. Bugunga kelib 7 million hujjat raqamli formatga o‘tkazildi. 2021 yilgacha FHDYoning barcha arxiv hujjatlari elektron formatga o‘tkaziladi. 

"Tug‘ilishni rasmiylashtirish yoki nikohni qayd qilish uchun FHDYo idoralariga murojaat qilib, zarur hujjatlarni to‘plash kerak bo‘ladi. Hozir boshqa viloyatda yashovchi kishi bilan oila qurish uchun o‘sha yerga borib murojaat qilishga yoki qandaydir ma'lumotlarni yig‘ib kelishga to‘g‘ri keladi. Elektron tizim boshqa sohalarda mukammal ishlamoqda, shu bois uni FHDYo tizimiga ham tatbiq etish muhim ahamiyat kasb etadi", - deydi Akbar Toshqulov. Hujjatlarning elektron formatga o‘tkazilishi O‘zbekiston fuqarolarining FHDYo dalolatnomalari bo‘yicha ortiqcha ovoragarchiliklarni bartaraf etishga yordam berdi. 

Shu tariqa O‘zbekiston fuqarolari FHDYo hujjatlariga doir ma'lumotlarni internet orqali olishlari mumkin bo‘ladi.