Tanzila Norboyeva kattaqo‘rg‘onlik ayol ishi bo‘yicha sudda ayol sha'ni himoya qilinishiga va'da berdi

O‘zbekiston Bosh vaziri o‘rinbosari, Xotin-qizlar qo‘mitasi raisi Tanzila Norboyeva Kattaqo‘rg‘onda ichki ishlar xodimi tomonidan ayol kishi tahqirlanganiga yana bir munosabat bildirdi.

«Hurmatli yurtdoshlar! Samarqandlik singlimizga qilingan qo‘pol munosabatni men ayol sifatida, Qo‘mita rahbari sifatida keskin qoralayman. Shu kimsaning jazolanish jarayonini albatta shaxsiy nazoratimga olaman. Sud jarayonida ham albatta vakillarimizning qatnashib, Ayol sha'nini himoya qilinishini ta'minlayman. Bunday holat qaytarilmasligi yuzasidan ichki ishlar vazirligi bilan muzokaralar tashkil qilinishini ma'lum qilaman», — deyiladi Norboyevaning Facebook’dagi sahifasida qoldirilgan postda.

Bundan avvalroq Norboyeva kattaqo‘rg‘onlik ayol voqeasiga munosabatida respublika xotin-qizlar qo‘mitasi ayollar bilan, u qanday xato qilib qo‘yganidan qat'iy nazar, bunday munosabatda bo‘lishga mutlaqo qarshiligini, qo‘mita shu ayolning muammosi bilan albatta shug‘ullanishini bildirib o‘tgandi.

4 iyul kuni internetda Kattaqo‘rg‘ondagi voqea videosini tarqatdi — unda Kattaqo‘rg‘onda militsiya xodimi o‘g‘irlikda gumon qilingan bir ayolni qip-yalang‘och yechinishga majbur qilgani tasvirlangandi. Ichki ishlar xodimi ayolni shu ahvolda ko‘chaga haydamoqchi bo‘ladi va bu jarayonni videoga oladi. Keyinroq gumondor ayol qo‘yib yuborilgan.

Avvaliga Bosh prokuratura matbuot xizmati San'at Umarov ushlangani va unga nisbatan qamoqqa olish tarzidagi ehtiyot chorasini qo‘llash masalasi ko‘rib chiqilayotganini ma'lum qildi.

«Bu — chidab bo‘lmas holat. Qanday lavozim yo unvonda bo‘lishdan qat'i nazar bunday harakatga mutlaqo yo‘l qo‘yib bo‘lmaydi», degandi Bosh prokuratura matbuot xizmati rahbari Surayyo Rahmonova.

Shuningdek Oliy Majlis Qonunchilik palatasi deputatlaridan biri Rasul Kusherbayev voqeaga munosabat bildirdi: ​«Ular o‘g‘ri deb gumon qilingan ayolni emas, butun boshli millatni, xalqni, davlatni yechintiribdilar. Qonunlarimizni, orimizni, erkak degan nomimizni oyoqosti qilibdilar».

Eng oxiri bo‘lib O‘zbekiston Ichki ishlar vazirligi bayonot berdi. Unda kattaqo‘rg‘onlik ayolning tahqirlanishi bilan bog‘liq videodagi «salbiy holatlar» vazirlik xodimi tomonidan sodir etilganini tan olingan. Shu bilan birga San'at​​ Umarov — ichki ishlar organlari safiga tasodifan kirib qolgan nopok xodimligiga urg‘u berilgan. 

«Ichki ishlar vazirligi rahbariyati tomonidan bunday salbiy holatlarni aniqlash, oldini olish va ichki ishlar organlari saflarini nopok, tasodifan kirib qolgan xodimlardan tozalash maqsadida, doimiy ravishda keskin choralar ko‘rib boriladi», — deyiladi bayonotda.