Moskva oblastida tojik migrantlari oilasidan bo‘lgan 5 yoshli qizchaning jasadi sport sumkasidan topildi

Moskva oblastining Serpuxov shahridagi temir yo‘l stansiyasi yaqinida besh yoshli qizchaning jasadi sport sumkasi ichidan topildi. «Moskovskiy Komsomolets»ning Rossiya Tergov qo‘mitasi Moskva oblasti bo‘yicha Bosh tergov boshqarmasi rahbari katta yordamchisi Olga Vradiyga asosan yozishicha, qizcha 22 iyul kuni o‘z oilasi bilan birga yashagan uyning bolalar maydonchasidan g‘oyib bo‘lgan.

Boshqalarning xabar berishicha, Vayda ismli qizcha yakshanba kuni yo‘qolib qolgan. U dugonasi bilan sayr qilib yurgan, shu payt uning yoniga noma'lum erkak kelib, muzqaymoq va o‘yinchoqlar taklif qilgan hamda qizchani noma'lum tomonga olib ketgan.

Qotillik bo‘yicha jinoyat ishi ochildi. Voqea joyida tergovchilar va tegishli soha xodimlari ish olib boryapti. O‘lim sababini aniqlash maqsadida sud-tibbiy ekspertizasini o‘tkazish belgilandi. Bolaning o‘limiga aloqador bo‘lgan shaxsni aniqlashga yo‘naltirilgan qator tergov va tezkor-qidiruv tadbirlari o‘tkazilmoqda.

Serpuxovda o‘ldirilgan 5 yoshli qizcha Tojikistondan kelgan migrantlar oilasidan bo‘lgan. Undan tashqari oilada yana uch nafar farzand bor.

Vaydaning onasi bolalar tarbiya bilan shug‘ullangan, otasi ma'lum bir ish joyiga ega emasligi aytiladi. Oilaning o‘zi rus tilida so‘zlashmaydi, shuning uchun politsiyaga ularning qo‘shnisi murojaat qilgan.

Qizchaning o‘limiga aniq nima sabab bo‘lgani hozircha oshkor etilmayapti.