Ko‘krak suti bilan oziqlantirish bolalar hayotini saqlab qoladi va mamlakatlar rivojiga hissa qo‘shadi

Jahon ko‘krak suti bilan oziqlantirish haftaligi har yili avgust oyining birinchi haftasida.

170 dan ortiq mamlakatlarda nishonlanadi. 1-7 avgust kunlari ushbu ijobiy amaliyotni targ‘ib qilishga bag‘ishlanadi.

Bu yilgi haftalikning shiori “Ko‘krak suti bilan oziqlantirish – hayot poydevori”. Buning boisi – emizish chaqaloqlar va onalar uchun umrbod sog‘lom hayotning asosi hisoblanadi. Ko‘krak suti bilan oziqlantirish tabiat in'omidir. U – juda oddiy, qulay va u insonlar hayotini saqlab qolishi va kelajakni yaratishi mumkin.

Emizish bolaning kasalliklarga qarshi birinchi emlanishidir. Ko‘krak suti orqali onalar o‘z farzandlariga immunitetlarini beradilar. Bu esa bolalarning shaxsiy immunitetlari shakllanguniga qadar bo‘lgan davrda ularni xavf-xatardan himoya qiladi. Ko‘krak suti bilan ozuqalantirish qanchalik erta boshlansa, yangi tug‘ilgan chaqaloqlar o‘limi ko‘rsatkichi shunchalik past bo‘ladi.

Dastlabki 6 oy davomida faqat ko‘krak suti bilan boqilgan bolalar bilan umuman emizilmagan yoki 6 oyga to‘lmaslaridan oldin ko‘krakdan chiqarilgan bolalarning salomatligi ko‘rsatkichlari solishtirilsa, birinchi guruhdagi bolalar ikkinchi guruhdagilarga nisbatan yuqumli kasalliklarga kamroq chalinishi hamda o‘lim ko‘rsatkichlari ham pastroq ekanligi ma'lum bo‘ladi.

Emizish bolaning sog‘lig‘ini, aqliy rivojlanishini, yaxshi ta'lim olishini oshiradi. Natijada katta bo‘lganida yaxshi daromad olish imkoniga yordam beradi. Ko‘krak suti bilan ozuqalantirishni qo‘llab-quvvatlashga sarflangan har bir AQSh dollarining iqtisodiy samarasi 35 AQSh dollariga teng.

Ko‘krak suti bilan oziqlantirish birgina emizikli ayolning ishi emas. To‘g‘ri, faqat onagina farzandini emizishi mumkin, biroq boshqalar ona va bola o‘zlarini yaxshi his etishlari uchun yordam berishlari mumkin.

Biz hammamiz – oila a'zolari, do‘stlar, mahalla, butun jamiyat va davlat – mas'ulmiz.

Onalarga oddiy dalda va ko‘mak berish hamda emizish uchun kerakli qulayliklarni yaratib berish orqali diareya bilan kasallanish holatlarini 2 barobar, nafas olish yo‘llari kasalliklarini esa uchdan birga kamaytirish mumkin.

Har bir bola uchun – eng yaxshi ozuqa. Har bir bola uchun – hayotning eng yaxshi boshlanishi.

Buni tushunib etishimiz lozim, chunki bolalar hayoting ilk kunlaridanoq ularga g‘amxo‘rlik ko‘rsatish, ularni yaxshi oziqlantirish va parvarishlash uchun onalarga sharoit yaratib berish – millat kelajagi to‘g‘risida qayg‘urish demakdir.