UNICEF: Afg‘on qizlarining ta’limiga qo‘yilgan taqiq falokatli oqibatlarga olib keladi

UNICEF ijrochi direktori Ketrin Rassel bu bayonotni Afg‘onistonda yangi o‘quv yili boshlanishi munosabati bilan e’lon qildi. Uning ta’kidlashicha, qizlar uch yildan ziyod vaqtdan beri oltinchi sinfdan keyin maktabga bora olmayapti.

«Afg‘on qizlarining ta’lim olish huquqi bugungi kunda muntazam ravishda buzilmoqda. Ularga darhol maktablarga qaytishga ruxsat berish kerak. Agar bu iqtidorli va qobiliyatli qizlar ta’limdan benasib qolaversa, oqibatlar butun avlodlarga ta’sir ko‘rsatadi», — dedi Rassel.

Uning fikricha, agar taqiq 2030 yilgacha davom etsa, 4 milliondan ziyod bola ta’limsiz qoladi va bu falokatli oqibatlarga olib keladi.

Shuningdek, Rassel tibbiyot sohasidagi ayollar — shifokor va akusherlar soni kamayishi tufayli ayollar uchun muhim tibbiy xizmatlar yetishmasligini ta’kidladi. Bu esa, uning hisobicha, har yili 3,5 ming chaqaloq va 1,6 ming ona hayotiga zomin bo‘lishi mumkin.

«Bu raqamlar ortida faqat statistika emas, balki yo‘qotilgan insonlar hayoti va vayron bo‘lgan oilalar turibdi», — deya qo‘shimcha qildi Rassel.

Afg‘onistonda 2021 yilning 15 avgustda «Tolibon» hokimiyatga kelganidan so‘ng, mamlakatdagi ayollar va qizlar uchun keng qamrovli taqiqlar joriy qilindi.

Boshlanishida ularga o‘rta va yuqori sinflarda o‘qish taqiqlandi, 2022 yil dekabridan esa universitetlarga borish ham man qilindi.

Shuningdek, afg‘on ayollariga mahalliy va xalqaro nodavlat tashkilotlarda ishlash taqiqlandi. Toliblar sartaroshxonalar va go‘zallik salonlarini yopdi, ayollarga bog‘lar, ko‘ngilochar maskanlar, sport zallari va filmlarda qatnashish ham taqiqlandi.