Toshkentda ikki qavatli dang‘illama uy 2,4 mlrd so‘mlik boshlang‘ich narx bilan auksionga qo‘yildi

Toshkentda ikki qavatli hashamatli uy auksionga qo‘yildi. Bundan E-ijro Auksion ma'lumotlari darak beryapti.

Baholangan narx - 2,4 mlrd so‘m. Bo‘nak miqdori (5%) - 121 mln so‘m. Bu auksion tarixidagi narxi 1 mlrd so‘mdan yuqori bo‘lgan oz sonli lotlardan biridir.

Bino Yunusobod tumanida joylashgan. 2012 yilda qurilgan, yer uchastkasining umumiy maydoni (ga) - 0,07. Uyning maydoni (kv.m) - 449,33. Turar-joy binosi 9ta xonadan iborat.

Obekt jinoyat ishlari bo‘yicha sud qarori bilan sotuvga qo‘yilgan. Ijro ishi yuritish sanasi - 2018 yil may.

Lot izohida aytilishicha, xonadonda fuqarolar istiqomat qilmoqda, ularni majburiy tartibda chiqarish sud orqali amalga oshiriladi.

Auktsion savdolari 20 avgust kuni bo‘lib o‘tadi, arizalar 18 avgustga qadar qabul qilinadi.