KXDR bo‘yicha yangi ma'lumotlar: Suriya bilan hamkorlik, Yamanga qurol va to‘xtatilmagan yadro dasturi

Shimoliy Koreya yadro va raketa dasturlari ustida ishlashni davom ettirmoqda. Bu haqda Reuters BMT hisobotiga tayangan holda xabar bermoqda.

Agentlik ma'lumotlariga ko‘ra, mustaqil ekspertlar KXDR BMT Xavfsizlik kengashining rezolyutsiyalarini buzgan holda o‘z yadro dasturi ustida ishlashni davom ettirayotganini ta'kidlamoqdalar.

Ta'kidlanishicha, ekspertlar BMTga Shimoliy Koreya bo‘yicha hisobotni 3 avgust, juma kuni taqdim etgan.

Hujjatga ko‘ra, KXDR Suriya bilan harbiy hamkorlikni ham qo‘llab-quvvatlamoqda va Yaman bilan qurol savdosini amalga oshirmoqda.

Shu bilan birga, ekspertlarning ma'lum qilishicha, Shimoliy Koreya to‘qimachilik mahsulotlarini olib chiqishga qo‘yilgan taqiqni buzgan.

Eslatib o‘tamiz, avvalroq KXDRga qarshi sanksiyalar qachon bekor qilinishi mumkinligi aytilgandi.