Tojikiston prezidenti Imomali Rahmon Shavkat Mirziyoyevga Alisher Navoiyning tojik tiliga tarjima qilingan asarlari to‘plangan «Chashmai xirad» kitobini sovg‘a qildi.
«Xalqimizda bir gap bor: bitta yaxshi kitob istalgan boylikdan yaxshiroq. Shuning uchun sizga tojik va o‘zbek adabiyoti klassiklari, shuningdek, zamonaviy yozuvchi va shoirlarning adabiy durdonalarini sovg‘a qilmoqchiman», - deya aytib o‘tdi Rahmon Toshkentdagi muzokaralar yakuni bo‘yicha.
Ular orasida «Gulbog‘i oshnoӣ», «Rudakӣ», «Armug‘oni dӯstӣ» to‘plamlari, shuningdek Alisher Navoiy asarlari to‘plangan «Chashmai xirad» bor.
Tojikiston prezidenti Shavkat Mirziyoyevga samimiy qabul uchun minnatdorlik bildirib, uni Tojikistonga o‘zi uchun qulay vaqtda tashrif buyurishga taklif qildi.
Toshkentdagi muzokaralar yakunida sanoat, standartlashtirish va sertifikatlashtirish, chegaradan o‘tish, ta'lim to‘g‘risidagi hujjatlarni tan olish, geodeziya va geologiya, qishloq xo‘jaligi, madaniyat hamda boshqa sohalardagi hamkorlik to‘g‘risida 27ta hujjat imzolandi. Xususan, Surxondaryo va Xatlon, Samarqand va So‘g‘d viloyatlarining savdo-iqtisodiy, ilmiy-texnikaviy hamda madaniy-gumanitar hamkorligi to‘g‘risidagi kelishuvlarga erishildi.
Davlat rahbarlari muzokaralar va imzolangan bitimlardan mamnunligini ta'kidladilar hamda ularning eng asosiysi Strategik sheriklik to‘g‘risidagi shartnoma ekanligini qayd etdilar.
