Taqiqlangan axborot mavjud bo‘lgan saytlar endi qanday aniqlanadi?

Vazirlar Mahkamasining “Butunjahon Internet tarmog‘ida axborot xavfsizligini yanada takomillashtirish chora-tadbirlari to‘g‘risida”gi qarori qabul qilingani xabar berilgandi.

O‘zbekiston Respublikasi qonunchiligi bilan tarqatilishi taqiqlangan axborot mavjud bo‘lgan Internet tarmog‘i veb-saytidan va (yoki) veb-sayt sahifalaridan foydalanishni cheklash tartibi to‘g‘risidagi nizomga ko‘ra, taqiqlangan axborot mavjud bo‘lgan Internet tarmog‘i axborot resurslarini aniqlash maqsadida O‘zbekiston matbuot va axborot agentligi Ommaviy kommunikatsiyalar sohasidagi monitoring markazi tomonidan qonunchilikda belgilangan tartibda Internet tarmog‘i resurslarining monitoringi yuritiladi.

Internet tarmog‘i resurslarining monitoringi, shuningdek, Markazga belgilangan tartibda kelib tushgan yuridik va jismoniy shaxslarning murojaatlari asosida ham olib boriladi.

Monitoring natijasida taqiqlangan axborot mavjud bo‘lgan Internet tarmog‘i axborot resursi aniqlangan taqdirda Markaz tomonidan bir ish kuni mobaynida Internet tarmog‘i axborot resursida taqiqlangan axborot mavjudligi yuzasidan xulosa tayyorlanadi.

Markaz xulosasida quyidagilar aks etgan bo‘lishi kerak:

xulosa qabul qilingan sana;
monitoring o‘tkazish uchun asos;
o‘rganish predmeti (taqiqlangan axborot aniqlangan axborot resurslari ro‘yxati);
o‘tkazilgan monitoring natijalari.

Monitoring natijalarini ekspertizadan o‘tkazish uchun Markaz Vazirlar Mahkamasining 2011 yil 5 avgustdagi 228-son qarori bilan tashkil etilgan Ommaviy kommunikatsiyalar sohasidagi ekspert komissiyasiga murojaat qilishga haqli.

Internet tarmog‘i axborot resursining identifikatsiya ma'lumotlari Reyestrga kiritilishiga asos bo‘lgan Markaz xulosasi yoki Ekspert komissiyasi qarori yuzasidan sudga murojaat qilinishi mumkin.