So‘g‘d rahbari o‘z tug‘ilgan kunida dalaga chiqib, 75 kg paxta terdi

Tojikistonning So‘g‘d viloyati raisi Rajabboy Ahmadzoda o‘tgan yakshanba kuni, o‘z tug‘ilgan kunida paxta terimchisiga aylandi: u paxta dalasiga chiqib, qo‘lda 75 kilogramm paxta terdi.

16 sentabr, yakshanba kuni So‘g‘d davlat hokimiyati organining 300dan ortiq xodimi ham uning ketidan dalaga chiqdilar: ular dehqonlarga yig‘im-terimda yordam berish uchun dalaga chiqishgan.

Viloyat raisi matbuot xizmatining xabar berishicha, shu kuni So‘g‘d ma'muriyati xodimlari Jabbor Rasulov tumanidagi «Sirdaryo» dehqon xo‘jaligida 8,5 tonnadan ziyod «oq oltin»ni terishgan.

«Shanba kuni, fuqarolar qabul qilinganidan keyin, rais paxta dalasida edi, yakshanba kuni ham u boshqa ishchilar bilan birga paxta terdi. Bir kun davomida u 75 kilogramm paxta terishga muvaffaq bo‘ldi», - deya ta'kidlab o‘tdi So‘g‘d viloyati raisining matbuot kotibi Muzaffar Yunusov. 

Eslatib o‘tamiz, avvalroq Farg‘onada sabzavot yetishtiruvchi fermerlarni paxta terimiga majburiy jalb etishning oldi olingani xabar berilgandi.

Farg‘ona viloyati, Uchko‘prik tumani hokimligining Qishloq xo‘jaligi bo‘limi bosh mutaxassisi S.Shukrullayev paxta terimi munosabati bilan tuman hududidagi sabzavot yetishtirishga ixtisoslashgan fermer xo‘jaliklariga har gektar yer maydoni uchun bir nafardan terimchi topib berish shartini qo‘ygani aniqlangan.