AQSh hukumati grin-karta berish jarayonini qat'iylashtirmoqchi

AQSh hukumati xorijliklarga grin-karta va viza berish jarayonini murakkablashtirmoqchi. Bu haqda «RIA Novosti» xabar tarqatgan.

Unga ko‘ra, AQSh hukumatidan ijtimoiy yordam olgan, xususan, oziq-ovqat, dori-darmon, ijtimoiy turar joy va vaqtinchalik boshqa yordam olgan muhojirlarning grin-karta so‘rab bergan arizalari rad etiladi. Agar AQSh rasmiylari «bu muhojir bundan keyin ham hukumatning yordami bilan yashashni maqsad qilgan», degan xulosaga kelsa, bu holatda ham grin-karta berilmaydi. 

Alohida holatlarda fuqarolikka da'vogardan 10 ming dollargacha bo‘lgan miqdordagi mablag‘ni depozit qilish so‘ralishi mumkin. Bu orqali hukumat da'vogar shaxs keyinchalik o‘zini o‘zi ta'minlay olishiga kafolat olmoqchi.

Tramp administratsiyasi bu o‘zgarishlar AQShga kelish istagidagi muhojirlar soni qisqarishi va o‘z-o‘zidan, respublikachilarning oraliq saylovlardagi «imkoniyatlarini oshirishi»ga umid bildirgan.

Ichki xavfsizlik vaziri Kirsten Nilsen ushbu qonun loyihasi mamlakatga kelayotgan muhojirlar amerikalik soliq to‘lovchilar yelkasiga yuk bo‘lib tushmasligi uchun ham zarurligini aytmoqda. Ushbu loyihani tanqid qilayotganlar esa, avvalo, muhojirlarning bolalari tibbiy yordam va oziq-ovqatlardan mosuvo bo‘lishidan xavotirda.

Tramp avvalboshdan muhojirlarga qarshi siyosat olib bormoqda. Prezident mamlakatga har yili minglab muhojirlarni qonuniy yo‘l bilan olib keladigan «Grin-karta» lotereyasidan voz kechish tarafdori hisoblanadi.