Jeenbekov oddiy reysda uchdi. Yana qaysi davlat rahbarlari yo‘lovchilar hamrohligida parvoz qilgan?

Ommaviy axborot vositalari va ijtimoiy tarmoqlarda Qirg‘iziston prezidenti Sooronbay Jeenbekov AQShga oddiy reyslarda borib kelgani haqida xabarlar tarqaldi.

Qirg‘iziston prezidenti BMT Bosh assambleyasining Nyu-Yorkdagi sessiyasida ishtirok etib qaytdi.

Siyosatshunos Temirlan Sarlikbek o‘g‘li samolyot bortida prezident bilan selfi qildi va u o‘zining oddiyligi bilan barchani hayratga solganini ta'kidladi.

Jeenbekov bilan selfisini Qirg‘iziston Qizil yarim oy Milliy jamiyati prezidenti Azamat Bayalinov ham internetga joyladi.

Ma'lumotlarga ko‘ra, avvalroq Sooronbay Jeenbekov Moskva va O‘shga ham xuddi shunday reys bilan parvoz qilgan.

Bu mamlakat prezidenti oddiy reysda parvoz qilgan yagona holat emas. Ayrim Yevropa davlatlari rahbarlarining yo‘lovchi samolyotlarda safarga borib-kelishlari tez-tez kuzatiladi.

Masalan, shu yilning sentabr oyi boshida Ukraina prezidenti Petro Poroshenko Londondan Kiyevga British Airways samolyotida uchib kelgandi. U Jon Makkeynning ta'ziya marosimida ishtirok etib, AQShdan qaytayotgan bo‘lgan.

Rossiyada shu yilning yozida bo‘lib o‘tgan futbol bo‘yicha jahon chempionati chorak final o‘yinini tomosha qilish uchun Xorvatiya prezidenti Kolinda Grabar-Kitarovich Zagrebdan Sochiga oddiy charter reysda bir guruh futbol ishqibozlari bilan keldi.

«Bu hukumat samolyotida uchishdan ikki baravar arzonga tushadi», – dedi u va oddiy samolyotda uchishning hech qanday g‘ayritabiiy joyi yo‘qligini aytdi. Xorvatiya prezidentining so‘zlariga ko‘ra, u Italiya va Eronga ham oddiy yo‘lovchi samolyotida uchib borgan.

Ana shunday tejamkor prezidentlardan yana biri Moldova prezidenti Igor Dodondir. U Moskva, Bishkek va Bryussel shaharlariga tashriflarini oddiy ekonom toifasidagi reyslarda amalga oshirgan.

«Prezident ekonom-klassda uchishini normal holat deb hisoblayman. U o‘zini saylagan fuqarolari kabi bo‘lishi kerak. Ekonom-klassda parvoz qilish, ishga velosipedda borish, oddiy odamlar mahsulot sotib oladigan do‘konda xarid qilish, xalqqa yaqin bo‘lish uchun trolleybusda yurish normal holatdir», deya izohlagan prezidentning sobiq maslahatchisi Valeriy Renitse.

Bunday davlat rahbarlari ro‘yxatini yana davom ettirish mumkin. Masalan, Serbiya prezidenti Tomislav Nikolich Minskka ishchi tashrifini Lufthansa aviakmopaniyasining oddiy reysida amalga oshirgan.

Litva prezidenti Dalya Gribauskayteni arzon Wizzair aviakompaniyasining Vilnyus - London yo‘nalishidagi ekonom toifasidagi samolyotida ko‘rishgan.

Finlyandiya prezidenti Tarya Xalonen Nyu-York - Xelsinki yo‘nalishida oddiy samolyotda parvoz qilgan.

Rim - Palermo yo‘nalishida parvoz qilayotgan Alitalia aviakompaniyasi samolyotida yo‘lovchilar hamrohligida Italiya prezidenti Serjo Mattarella uchgan.

Polsha prezidenti Anjyey Duda Mexikoga oddiy yo‘lovchi samolyotda borgan bo‘lsa, mamlakatning avvalgi prezidenti Bronislav Komorovskiy ham tashriflarini ko‘pincha yo‘lovchi samolyotlarda amalga oshirgan.