Abramovich Londondan zerikkan ko‘rinadi – Bloomberg milliarder haqidagi tafsilotlarni e'lon qildi

Milliarder Roman Abramovich shu yilning bahoridan beri Londonga kelmadi va hatto o‘zining Britaniyadagi eng qimmat aktivi – “Chelsi” klubini sotishni rejalashtirgan. Abramovich uni 3,9 mlrd dollarga sotmoqchi. 2,3 mlrd dollarlik taklifni esa u rad etdi, deb yozadi Bloomberg.

Tafsilotlar

Abramovich 2018 yil bahoridan buyon Londonda ko‘rinmayapti – o‘shanda The Bell birinchi bo‘lib biznesmen investitsion vizasini uzaytirish borasida muammoga duch kelganini yozgandi. May oxirida Abramovich Angliya Kubogi finalini o‘tkazib yuborishiga to‘g‘ri keldi – o‘shanda uning klubi “Manchester Yunayted” ustidan 1:0 hisobida g‘alaba qozongandi.

The Bell butun dunyodagi samolyotlar transponderlaridan ma'lumot yig‘uvchi ADS-B Exchange ma'lumotlar bazasidan Abramovichning Boeing 767 samolyoti Londonda oxirgi marta 1 aprelda bo‘lganligini aniqladi.

Keyinroq Britaniya OAV Abramovich viza olish uchun bergan arizasini qaytarib olgani, buning o‘rniga unga Buyuk Britaniyada vizasiz olti oy bo‘lish imkonini beruvchi Isroil pasportini olgani haqida xabar qildi.

Britaniya vizasi bilan bog‘liq muammolar va Amerika sanksiyalari nishoniga tushib qolish xavfi milliarderni “Chelsi”ni sotish haqida jiddiy o‘ylashga majbur qildi, deb yozadi Bloomberg. Abramovich klubni to‘liq yoki qisman sotish uchun Nyu-Yorkning Raine Group bankini maslahatchi sifatida yolladi. Nashr manbalarining bildirishicha, u klubni 2,3 mlrd dollarga sotish haqidagi taklifni rad etgan.

Abramovichga “Chelsi”dan ayrilish qiyin bo‘ladi, deb yozadi Bloomberg uni yaqindan bilgan manbalarga tayanib. U jamoaga qattiq bog‘lanib qolgan. «Uning uyida va yaxtasida deyarli har bir burchakda futbol o‘yini namoyish etilayotgan teleekranlarga ko‘zingiz tushadi», — degan uning yaqin tanishlaridan biri.

Biznesmen  2003 yilda Britaniya klubiga 220 mln dollardan ortiq sarmoya kiritgan va o‘shandan buyon klub uchun 1,4 mlrd dollardan ortiq pul sarfladi. Klubning zararga ishlashi Abramovichni tashvishlantirmagan. “Chelsi” faqat bir marta – 2014 yilda daromad topgan.

Biznesmen klubga nafaqat ko‘p pul sarflagan, balki uni faol boshqargan ham. U transferlar bo‘yicha qaror qabul qilgan va bo‘lajak murabbiylar bilan shaxsan o‘zi suhbatlashgan. Iyulda Abramovich Antonio Konte o‘rniga Mauritsio Sarrini murabbiylikka qo‘ydi. U “Chelsi”ning 15 yil ichidagi 11-murabbiyi bo‘ldi.

Endi ko‘p millionli xarajatlarga chek qo‘yiladi — “Chelsi” yaqinda “noqulay investitsion muhit” sababli o‘z stadioni qurilishini to‘xtatganini e'lon qildi.

Abramovichning Buyuk Britaniyadagi aktivlari

Abramovich —Londongrad (Londongrad) (rossiyalik boylarning mehr qo‘yganligi tufayli Britaniya poytaxtini hazillashib shunday deb atashadi) shahrining haqiqiy ramzi hisoblanadi, deb yozadi Bloomberg. Milliarderga futbol klubidan tashqari, Buyuk Britaniyaning eng qimmat ko‘chasi — Kensington Palace Gardens’dagi 15 xonali koshona ham tegishli (uy 2011 yilda 118 mln dollarga sotib olingan). Abramovichning yetti farzandidan beshtasi Buyuk Britaniyada o‘qigan.

Biznesmenga 30% aksiyasi tegishli bo‘lgan Rossiyaning Evraz metallurgiya kompaniyasi shtab-kvartirasi ham Buyuk Britaniya yurisdiksiyasi ostida. AQSh tomonidan qo‘yilishi mumkin bo‘lgan sanksiyalar ehtimoli tufayli Abramovich kompaniyaning boshqa egalari bilan birga o‘z ulushlarini bo‘lib olishdi va alohida tuzilmalarga qo‘yishdi.

The Times’ning yozishicha, viza bilan bog‘liq muammodan oldin rossiyalik milliarder Londonda qariyb 40 mln dollarga pentxaus sotib olgan. Pentxaus Stamford Bridge — uning jamoasi uy stadioni yonida joylashgan.

Bloomberg milliarder shuningdek Britaniyada Truphore, Velocys, AFC Energy va Highland Gold kompaniyalarida ham aktivlarga ega ekanligini yozadi.

Sabablar

Rossiya va Buyuk Britaniya o‘rtasidagi munosabatlar 4 mart kuni Solsberida GRU sobiq ofitseri Sergey Skripal va uning qizi Yuliya zaharlanganidan so‘ng buzildi. Britaniya hukumati bu voqeada Moskvani ayblamoqda. Rossiya esa ayblovni rad etmoqda.

Skripallar zaharlanganidan keyin Buyuk Britaniyada yashovchi rossiyalik biznesmenlarda tashvishlanish uchun bir nechta sabablar paydo bo‘ldi. Avvaliga Britaniya hukumati investitsion vizalarni berish va uzaytirish jarayoni qayta ko‘rib chiqilishini e'lon qildi. 

Bundan tashqari, mazkur mojaroga qadar Britaniya hukumati Unexplained Wealth Orders (UWO) deb ataluvchi qonunni qabul qilgan bo‘lib, unga muvofiq, mamlakat hududida o‘z aktivlari toza yo‘l bilan topilganini isbotlay olmagan xorijlik shaxslarning mulklari hibsga olinadi. 

May oyida shuningdek, Britaniya parlamenti Amerikaning Magnitskiy qonuniga o‘xshash qonunga tuzatishlar kiritdi. Unga ko‘ra, inson huquqlarini buzishda ayblangan shaxslarning aktivlari hibsga olinadi.

«Britaniya hukumatida xuddi granata portlaganga o‘xshaydi va bundan keyin nima bo‘lishini hech kim bilmaydi. Hamma Britaniyadagi aktivlarini kamaytirmoqda», — dedi YuKOSning anchadan beri Buyuk Britaniyada yashaydigan sobiq yuristi Dmitriy Gololobov Bloomberg bilan suhbatda.