Interpol sobiq rahbarining rafiqasi tahdidlar haqida ma'lum qildi

Interpol sobiq rahbari Men Xunveyning rafiqasi Greys Men o‘z hayoti uchun tashvishda ekanligini ma'lum qildi. Bu haqda u CNN’ga bergan intervyusida aytib o‘tdi.

Interpol prezidenti lavozimini egallagan Men Xunvey sentabr oyining oxirida yo‘qolib qoldi. Keyinchalik, u Xitoyda hibsga olingani, hukumat uni korrupsiyada gumon qilayotgani aniqlandi. Xunvey tashkilot rahbari lavozimidan iste'foga chiqarildi.

Greys Menning tan olishicha, turmush o‘rtog‘i g‘oyib bo‘lganidan keyin unga noma'lum shaxs tahdidlar bilan qo‘ng‘iroq qilgan. Shuningdek, uning aytishicha, otasi bilan nima yuz berganini o‘zining ikki nafar yetti yoshli o‘g‘illaridan yashirib kelmoqda.

Eslatib o‘tamiz, avvalroq Xitoyda Interpol sobiq rahbari korrupsiyada gumon qilinayotgani xabar berilgandi.