Olmaliqda «MISiS» filiali tantanali ochiladi. Alisher Usmonovning ishtirok etishi kutilyapti

2018 yilning 18 oktabr kuni «Yangi iqtisodiyot uchun yangi kadrlar» Rossiya-O‘zbekiston birinchi ta'lim forumi doirasida Olmaliq shahrida Rossiyaning “Milliy texnologik tadqiqotlar universiteti “MISiS” filiali ochiladi. 

Olmaliqdagi filial universitetning oltinchi filialiga aylanadi. “Milliy texnologik tadqiqotlar universiteti “MISiS” O‘zbekistonda o‘z bo‘linmasiga ega Rossiyaning to‘rtinchi oliy ta'lim muassasasi bo‘ladi.

Kun.uz manbasi ma'lumotiga ko‘ra, tantanali ochilish marosimida bir qator yuqori mansabli shaxslar ishtirok etadi. Ular orasida Rossiya fan va oliy ta'lim vaziri Mixail Kotyukov, O‘zbekiston oliy va o‘rta maxsus ta'lim vaziri Inomjon Majidov, «MISiS» rektori Alevtina Chernikova, «OTMK» AJ boshqaruvi raisi Abdullo Xursanov bor.

Bundan tashqari, marosimda asli kelib chiqishi o‘zbekistonlik bo‘lgan rossiyalik milliarder, USM Holdings aksiyadorlik jamiyati ta'sischisi va rahbari Alisher Usmonov ham ishtirok etishi kutilyapti.

Ma'lumot uchun: mazkur ta'lim dargohida respublikaning ishlab chiqarish-sanoat tarmog‘i uchun yuqori malakali muhandis-texnik kadrlar tayyorlanadi.

2018-2019 o‘quv yilining kunduzgi bo‘limi uchun «Tog‘ ishi», «Metallurgiya», «Ishlab chiqarish va texnologik jarayonlarni avtomatlashtirish hamda boshqarish» yo‘nalishlarida 150 nafar talaba qabul qilindi.

Ushbu oliy ta'lim dargohida ta'lim berish jarayoniga mahalliy mutaxassislar bilan birgalikda Rossiyadagi va xorijdagi yetakchi oliy o‘quv yurtlarida pedagogik tajribaga ega bo‘lgan rossiyalik o‘qituvchilar ham jalb etilgan.

Filial bitiruvchilariga O‘zbekiston va Rossiyada oliy ta'lim to‘g‘risidagi hujjat sifatida tan olinadigan “MISiS” MTTUning belgilangan namunadagi diplomi beriladi.