«Real» futbolchilari Kontega ishonchsizlik bilan qaramoqda, klubda boshqa asosiy nomzod bor

«Tottenhem» bosh murabbiyi Maurisio Pochettino kecha «Real»dan iste'foga chiqarilgan Xulen Lopetegining o‘rnini egallash uchun birinchi raqamli nomzod bo‘lib turibdi, deb xabar tarqatdi The Sun.

Manbaga ko‘ra, «qirollik klubi» vakillari o‘tgan hafta Londonga kelib, Pochettinoga yaqin kishilar bilan uchrashgan va ortga qaytgach, klub prezidenti Florentino Peresga ijobiy xabarlar yetkazishgan. Endilikda rahbariyat noyabr oxiriga qadar 46 yoshli ushbu mutaxassisni klubga olib kelishni istamoqda.

Shu bilan birga, nashrning aniqlashicha, hozirga qadar ayni lavozimga asosiy nomzod sifatida ko‘rsatib kelingan Antonio Konte Madridga kelish fikridan qaytishi mumkin. «Real»dagi futbolchilarning mavqeyi va murabbiyga bosim o‘tkaza olishi italiyalik mutaxassisni ikkilantirib qo‘ygan.

Xususan, kuni kecha jamoa sardori Serxio Ramosdan «Chelsi»ning sobiq ustozi klub murabbiyi bo‘lishiga qanday qarashi haqida so‘rashganida u shunday deb javob bergan:

«Hurmat qozoniladi, talab qilib olinmaydi. Siz taniydigan murabbiylar bilan allaqachon hamma sovrinlarni yutib bo‘lganmiz. Klubda o‘yinchilarini boshqarish murabbiyning texnik bilimidan ko‘ra ko‘proq ahamiyatga ega», - deb aytgan Ramosning so‘zlarini keltiradi The Sun.

Nashr xulosasiga ko‘ra, «Real» futbolchilari Kontening «Chelsi»dagi faoliyati davomida ayrim o‘yinchilar bilan kelisha olmagani sabab unga ishonchsizlik bilan qarashmoqda.