Qirg‘izistonda O‘zbekistondagi elchi lavozimiga nomzod tasdiqlandi

Qirg‘iziston Jogorku Keneshining tashqi ishlar qo‘mitasi mamlakatning O‘zbekistondagi elchisi lavozimiga Ibrohim Junusov nomzodini tasdiqladi. Ushbu qaror 13 noyabr kungi qo‘mita yig‘ilishida qabul qilindi.

I. Junusov nomzodi tashqi ishlar vazirining birinchi o‘rinbosari Dinara Kemelova tomonidan taqdim etildi.

Ibrohim Junusov 2014 yildan Qirg‘izistonning Turkiyadagi elchisi lavozimida ishlab kelayotgan edi. Uning vakolatlari muddati tugagan.

Eslatib o‘tamiz, avvalroq Qirg‘iziston O‘zbekistonga yangi elchi tayinlamoqchi ekani xabar berilgandi.